Mafhungo maḓifha  kha Chiefs malugana na Rushwin Dortley

Mulanguli wa mutsireledzi wa Kaizer chiefs Rishwin Dortley o nea mafhungo maḓifha nga ha mutambi uyu.

Mutambi uyu ndi kale a sa tsha tamba nga murahu ha u huvhala ha magona he ha ṱoḓa u itwa muaro nga ṅwedzi wa Lambamai.

U bva tsheetsho, o vha a tshi khou shuma nga maanḓa u itela u vhuyelela kha mutambo. Mulanguli wawe uri u do vhuya nga nwedzi wa Phando.

Musi a sa athu huvhala, Rushwin Dortley o vha e muṅwe wa vhatambi vha nṱha kha thimu ya Kaizer Chiefs na Bafana Bafana.

“U ḓo vhuya nga ṅwedzi wa Phando.O vha a tshi nga vhuya phanḓa ha zwenezwo fhedzi o vha a tshi kha ḓi pfa vhuṱungu kha magona awe,” ho amba mulanguli.

“O vha o no tamba kale a khopfa vhuṱungu musi a sa athu u ita muaro kha khalanwaha yo fhiraho.Nga murahu ha zwenezwo, muaro wo vha u tshi ṱoḓea nga ṅwedzi wa Lambamai.

“O vha a tshi nga vhuya nga Fulwi, fhedzi o vha a sa athu fhola tshoṱhe – o vha a tshi kha ḓi pfa vhuṱungu .

“Ngauralo dokotela we a mu ita muaro o vhuya a vhona uri ndi mini tsho itaho uri a bvele phanḓa a tshi pfa vhuṱungu.

“Zwenezwo zwo mu humisela murahu nyana kha tshifhinga tsha u fhola fhedzi zwo vha zwi zwithu zwine zwa tea u itwa.”

Vho engedza nga uri vha khou lavhelela uri musi thimu i tshi vhuyelela gym nga ṅwedzi wa Phando, na ene u ḓo vha e hone.

“U ḓo thoma u gudiswa uri a vhe o ḓiimisela u lwela vhuimo hawe kha thimu.Tshipikwa tshawe zwino ndi u vhuyelela kha tshivhumbeo.

“U khou ṱoḓa u shela mulenzhe kha u thusa thimu u gonya kha logi uri i vhe na tshikhala tsha u wina ligi kana u fhedza kha vhuimo ha vhuvhili.

“U ṱoḓa zwenezwo na u vhuyelela kha thimu ya lushaka phanḓa ha Tshiphuga tsha Ḽifhasi,” o bvela phanḓa.

“Zwine zwa sa hanedzee nga hae ndi vhukoni hawe na vhuimo hawe – ndi mutambi wavhuḓi vhukuma. Ndi mulapfu, u a kona u vhala mutambo…

• VHALANI HAFHU: Ndah o takala nga Pirates yo wina  Carling Cup 

“U ḓo vhuya nahone ha nga ḓo lwa fhedzi u itela u thusa Kaizer Chiefs, fhedzi u ḓo dovha a lingedza u vhuyelela kha thimu ya lushaka.”