Tshiitisi tsho itaho uri Orlando Pirates i bvise Ndah

Orlando Pirates yo tshuwisa vhatikedzi musi i tshi ḓivhadza uri yo bvisa muṅwe mutsireledzi, Olisa Ndah.

Mutambi uyu mulapfu o vha a tshi dzhiiwa sa munwe wa vhane vha nga dzhia vhudzulo ha Mbekezeli Mbokazi we a rengiselwa Chicago FC kha ḽa US zwenezwino.

Fhedzi zwino nga matsheloni a Ḽavhuṋa, Orlando Pirates yo ḓivhadza uri yo vhofholola Olisa Ndah kha thendelano yawe.

Hu tendiwa uri o sala na minwedzi ya rathi fhedzi kha thendelano yawe, ngauralo ho tendelwa uri u do ṱuwa hu tshe na tshifhinga.

 Vha Orlando Pirates vhari hezwi zwo itwa nga murahu ha musi Olisa Ndah o ita khumbelo ya u vhofhololwa.

Hezwi ndi uri a thome a ṱoḓe mushumo kha iṅwe thimu hune a ḓo wana tshifhinga tsha u tamba tshifhinga tshoṱhe.

“Kilaba i ṱhonifha lutamo lwa Ndah lwa u wana tshifhinga tshinzhi tsha u tamba,” Pirates yo ralo kha tshitatamennde.

“Ri dovha ra livhuwa u fulufhedzea hawe musi a tshi amba na vhalanguli vha kilabu nga ha pulane dzawe.

“Ndi nga wonoyo muya wa u ṱhonifhana he ha swikelwa tsheo ya vhukonani.

“Ri tama u livhuwa Olisa kha vhuphurofeshinaḽa hawe, u ḓikumedzela na mushumo wawe kha kilabu.”

Naho vhukoni hawe vhu sa timatimisiwi, u huvhala zwo thithisa mveledziso yawe kha Bucs miṅwahani i si gathi yo fhiraho.

Sa vhunga o no fhola nga murahu ha u fhira nwaha a sa khou tamba, ho vha hu tshi khou ambiwa uri u do vhuyelela kha thimu.

Hezwi zwihuluhulu nga murahu ha musi Mbokazi o ṱuwa. Fhedzi Pirates yo saina Mpho Chabatsane uri a ḓadze tshikhala.

• VHALANI HAFHU: Ndi ngani Ouaddou a sa khou vhilaela nga ha mbambe ya ligi

Ndah – wa minwaha ya 28 – o dzhena kha Pirates nga 2021 nahone o no tamba mitambo i fhiraho 80 kha tshigwada.