Arrows yo humbela pfarelo kha u ‘kolela’ Sipho Mbule

Vha Golden Arrows vho ṱavhanya u bvisa tshinepe tshe tsha vha tshi tshi khou tshimbila na mulaedza u kolelaho  Sipho Mbule vha zwi posa kha nyanḓadzamafhungo  nga Ḽavhuvhili.

Vho ita zwenezwi nga murahu ha musi vha Pirates vho ḓivhadza uri tshitediamu tsha hayani havho tsho shandukiswa dzina ḽa vha Orlando Amstel Arena.

Arrows yo mbo ḓi posa tshinepe tsha muthu o sedzaho muyani vha ri ndi Sipho Mbule o ita nga u ralo musi a tshi khou fhira tshitediamu tsha Orlando.

Zwe zwa sinyusa vhathu ndi uri vho shumisa Mbule ngauri vho vha vha tshi zwidivha uri una divhazwakale  ya u nwa nga u ḓifunela.

Vho vha vha tshi khou mu sea vha tshi ri sa izwi tshitediamu tsho rinwa dzina ḽa halwa, Mbule u ḓo takala vhukuma.

Naho zwo ralo, nga murahu vho zwi vhona uri ho vha hu nyito i si ya vhuḓi, nahone vha phumula zwe vha zwi posa naho vhanzhi vho vha vho no zwi vhona.

Muṅwe mufuni ane a tendiwa uri u bva kha Mamelodi Sundowns, o sasaladza vhukuma hezwi, a ri a zwi faneli thimu ya vhuimo hayo.

Mufuni uyu ane a ḓivhidza Mnotho kwi-X o ṅwala kha Twitter kha siaṱari ḽa Arrows nahone a ri: “Heḽi ndi siaṱari ḽa Arrows ḽa tshiofisi.  Heyi tshika yo phumuliwa.

“Hezwi ndi zwithu zwi si na mushumo zwi fanaho na zwine zwa bva kha siaṱari ḽa thiofisi ḽa thimu ya PSL.”

Arrows yo fhindula nga u humbela pfarelo kha hezwo, vhari vho ita phoswo ndi ngazwo vho ṱavhanya u i phumula.

• VHALANI HAFHU:U wina ha Downs zwo vula gepe  kha Pirates na Chiefs

Naho zwo ralo, vhaṅwe vho tikedza zwe vha amba, vha ri zwo vha zwi tshi tou vha miswaswo i sa ambi tshithu nahone ndi tshipiḓa tsho ḓoweleaho tsha bola ya milenzhe.