Mugudisi wa TS Galaxy Queens u takala nga u vhuya ha Refiloe jane
Mugudisi muhulwane wa TS Galaxy Queens Vho-Sizwe Sibiya vho takalela u vhona mukapuṱeni wa Banyana Banyana Vho-Refiloe Jane vha tshi vhuya kha tshigwada tsha thimu ya lushaka.
Jane o dovha a dzhena kha Banyana phanḓa ha thonamennde ya Tshaka Tharu na Botswana na Zambia.
Mitambo iyi i vhumba tshipiḓa tsha ndugiselo dza Afrika Tshipembe dza u lwela tshiphuga tshavho tsha Tshiphuga tsha Dzitshaka tsha Vhafumakadzi tsha Afrika (WAFCON).
Sibiya o amba na SABC Spotr nga ha ndeme ya u vhuya ha Jane na lwendo lwawe lwa maḓipfele.
“Kha ene , ndi tshifhinga tshihulwane,” ho amba Sibiya.
“Vho vha vhe tshipiḓa tsha ndeme tsha nzudzanyo ya Banyana nahone ndi muthu wa ndeme sa mukapuṱeni wa thimu ya lushaka.”
Nga nḓila yo khetheaho, Sibiya o ṋea Jane tshiṱangu tsha u vha mukapuṱeni kha mutambo wa TS Galaxy wa Hollywoodbets Super League na Ezemvelo, sa u rumelwa mushumoni wawe wa Banyana.
“Ndo mu vhudza uri ri na vhakapuṱeni kale kha thimu, fhedzi kha mutambo uyu, ndo vha ndi tshi ṱoḓa uri a pfe vhuḓifhinduleli phanḓa ha musi a tshi vhuyelela mushumoni wa lushaka,” o ṱalutshedza.
Jane zwenezwino o fhola kha vhulwadze he ha vha vhu tshi khou mu vhea khomboni nahone a dzhena kha TS Galaxy u itela u vusuludza fulufhelo ḽawe na u ḓilugisa.
Sibiya u tenda uri kilabu yo mu ṋea vhupo ho teaho ha u ita nga u ralo.
“Tshipikwa tsha u thoma ho vha hu u mu thusa uri a dovhe a fune mutambo. Ro ita uri pfhe a kha tshikhala tsho takalaho na tsho tsireledzeaho,” ho amba mugudisi.
“Musi wo takala, u fhola nga u ṱavhanya na u tamba khwine.”
Sibiya o humbula nga ha nndwa dzawe dza u huvhala u itela u ṱumana na lwendo lwa Jane.
“Na nṋe ndo vha ndo no vhuya nda vha kha tshenetsho tshikhala. Musi u tshi ḓitumana nga muṱa na zwivhuya, zwi a thusa uri u bvele phanḓa,” o ralo.
U vhuya ha Jane kha Banyana a si u ṱuṱuwedza fhedzi thimu ya lushaka, fhedzi ndi tshifhinga tsha u ḓihudza kha TS Galaxy, ye ya vha na mushumo wa ndeme kha nḓila yawe ya u fhola.
“O ḓilugisela, o ṱuṱuwedzea, na u hwala fulufhelo ḽa kilabu yawe kha thimu ya lushaka,” ho amba Sibiya.
Translated by Nthaduleni Rolivhuwa
