Zwi takadzaho Tyson Hlatshwayo nga vhatsireledzi vha Bafana
Mutambi wa kale wa Orlando Pirates na Bafana Bafana Thulani Hlatshwayo u tenda uri Pitso Mosimane u na zwishumiswa zwoṱhe zwi ṱoḓeaho—zwihuluhulu kha muhasho wa u tsireledza.
Mosimane u khou lavhelelwa u sedzana na mutambo wawe wa u thoma wa tshifhinga tshawe tsha vhuvhili sa mugudisi wa Bafana musi vha tshi tamba na Guinea nga Mugivhela uno.
Mutambo uyu ndi wa u ṱanganela kha Tshiphuga tsha Dzitshaka tsha Afrika tsha 2027 nahone u ḓo tambelwa Orlando Amstel Arena.
Bafana i ḓo vha i si na Mbekezeli Mbokazi nga ṅwambo wa u huvhala, fhedzi Mosimane u kha ḓi vha na vhatambi vha ngaho Ime Okon ane a tamba kha ḽa Germany, na Olwethu Makhanya ane a vha kha fomo yavhuḓi kha Glasgow Rangers ngei Scotland.
Hlatshwayo uri Afrika Tshipembe li na mashudu vhukuma malugana na vhatambi vhane vha vha hone kha vhuimo uhu.
“Ndi vhona unga ro shudufhadzwa vhukuma nga vhatambi vhane ra vha navho kha vhuimo uhu.Vhumatshelo vhu vhonala vhu havhuḓi,” o ralo.
“A si uri ndi vhavhuḓi fhedzi; hu dovha ha vha na vhumatshelo henefho ngauri vho khwaṱha nahone vha tshee vhaṱuku.”
“Zwino, kha tshifhinga tshiswa hetshi nga fhasi ha Pitso Mosimane, hu sa londwi uri ndi nnyi ane a tamba kana hu shumiswa ṱhanganyelo dzifhio, tshithu tsha ndeme vhukuma ndi uri vha tikedzane.”
Hlatshwayo u tenda uri u tamba Europe na US zwi vhuedza vhukuma vhatambi avha.
O ṱhogomela uri u wana tshenzhelo nnḓa ha shango zwi ita uri vha pfesese khwine tshaka dzo fhambanaho dza vhatambi na zwitaila zwa u tamba.
Thulani Hlatshwayo o ṋea Makhanya sa tsumbo khulwane ya hezwi, a tshi ṱhogomela mvelaphanḓa yawe u bva kha u tamba Stellenbosch u ya kha MLS, nahone zwino u kha ḽa Europa.
Thulani Hlatshwayo uri hezwi ndi zwa ndeme nga maanḓa kha vhatsireledzi, sa izwi vhuimo honoho kanzhi vhu tshi bveledza vharangaphanḓa vha thimu.
- VHALANI ZWINWE: Coat of Arms: Zwiga zwi Ambaho Nga Vhuthihi ha Lushaka
Vho isa phanḓa na u amba uri vhatambi vha Bafana vhane vha tamba kha Mamelodi Sundowns vha ḓo vhuelwa vhukuma nga u shela mulenzhe kha FIFA Intercontinental Cup.
