Mohamed Salah o mangadza Liverpool nga u  ṱuwa hawe 

Mutambi wa Egypt Moha Salah o sia Liverpool kha vhuleme vhuhulwane nga ha vhumatshelo hayo, a bvisa tshitatamennde  tshe tsha vhanga khakhathi.

Mutambi o dzinginya uri mutambo wa Mugivhela u ḓaho na Brighton u nga vha wa u fhedzisela kha kilabu – arali a tshi ḓo tamba.

Kha tshitatamennde tshi tshuwisaho nga murahu ha mutambo wa mafhelo a vhege o fhiraho, Salah o ṱhasela vhalanguli vha tshigwada na u khwaṱhisedza u fhandekana hawe na mulanguli muswa Arne Slot.

Mohamed Salah, we a vha a tshi shuma vhukuma kha u bvelela ha Liverpool miṅwahani i si gathi yo fhiraho, o amba khagala, a ri, “heyi kilabu yo nposa fhasi ha bisi.”

O dovha a ṋaṋisa khanedzano nga u dzumbulula u fhandekana hawe na mulanguli Slot, a ri, “Hu na muthu ane a sa nṱoḓe kha thimu.”

Tshifhinga tsha tshitatamennde tshawe  — maḓuvha a si gathi musi a sa athu vhetshelwa u imela Egypt kha Tshiphuga tsha Tshaka dza Afrika (Afcon) — tsho sia Liverpool i kha vhuleme.

Zwe a amba zwo kokodza ṱhogomelo nahone zwino Liverpool i khou ṱoḓa u vhona uri i ḓo ita mini nga hazwo.

Zwo dovha zwa vha ṱhoho i fhisaho kha Social media. Mutambi wa kale wa England na Liverpool Michael Owen ndi munwe wa vhe vha amba nga hazwo.

Owen o dzhena kha social media a sasaladza tsheo ya Salah ya u bvela khagala na zwililo zwawe.

Owen o tenda uri Salah o shela mulenzhe vhukuma kha thimu fhedzi a sasaladza nḓila ye tshitatamennde tsha farwa ngayo.

“Oh @mosalah. Ndi vhona unga ndi a pfesesa uri ni ḓipfa hani,” Salah o ṅwala. “Ndi kale ni tshipiḓa tsha heyi thimu nahone no wina zwoṱhe zwe na vha ni tshi nga zwi wina navho.”

“Fhedzi hoyu ndi mutambo wa thimu u nga si ambe zwe wa amba tshitshahani. U khou ya Afcon hu si kale.”

“No vha no fanela u sokou fara zwaṋu, na ḓiphina nga u imela shango ḽaṋu nahone na vhuya na vhona uri zwithu zwi khou tshimbila hani.”

Zwe Owen a amba zwi sumbedza maḓipfele o phaḓalalaho a uri Mohamed Salah u na zwililo zwa nga ngomu kha kilabu.

Fhedzi tsheo yawe ya u nyadzisa tshigwada musi a tshi khou livha mitamboni ya dzitshaka a i takalelwi  nahone ndi tshiṱhavhi kha tshigwada.

• VHALANI HAFHU: Ramović u ṱoḓa ‘pfarelo’ kha Mokwena phanḓa ha mutambo

Kiḽaba i kha ḓi ḓo bvisa tshitatamennde tsha tshiofisi malugana na zwine mutambi a amba kana vhumatshelo hawe.