Dzikhamphani dzi khou lwa malugana na Mbekezeli Mbokazi

Ho vuwa khanedzano vhukati ha khamphani mbili dzine dza langa vhatambi sa izwi vhuvhili hadzo dzi tshi khou amba uri mutsireledzi Mbekezeli Mbokazi u fhasi ha vhuvhusi hadzo.

Khanedzano iyi yo vuwa nga murahu ha musi ho bvelela uri Vho-Mbekezeli Mbokazi vho vha vhe kha ḽa US he vha saina na kilabu ya bola ya milenzhe ya Major League, Chicago Fire.

Zwino vha QT Sports vha khou amba uri mutambi uyu ndi wavho nahone vho vha vho fanela u hulisa thendelano yawe na Chicago Fire.

Kha ḽiṅwe sia, P Management Agency, naho zwo ralo, i khou kombetshedza uri mutambi u kha ḓi vha fhasi ha thendelano navho na uri QT Sports yo vha ṱangula nga nḓila i si yavhuḓi.

Hu do elelwa uri Vho-Mbokazi vho vha vho ya US vha vhuya phanda ha mutambo wa Betway Premiership vhukati ha Orlando Pirates na Chippa United.

Lisenethini yo lingedza u wana vhupfiwa kha dzi khamphani, fhedzi vha P Management a vho ngo fara luṱingo.

QT Sports a yo ngo fhindula milaedza ye ya siiwa uri i fhindulwe nga tshifhinga tsha u ya kha gurannḓa.

Vho-Mbekezeli Mbokazi vho saina thendelano ya tshifhinga tshilapfu na kilabu ya Amerika ya Chicago Fire nahone a zwi athu vha khagala uri khanedzano iyi i ḓo fhelela ngafhi.

Zwi nga fhedza zwo swika khothe sa izwi zwi tshi vhonala uri vhunzhi ha tshelede i do ya kha khamphani ye ya vha i tshi khou shuma na thendelano yawe.

Mutambi uyu u khou lavhelelwa u vhuyelela US u dzhena kha thimu yawe ntswa nga ṅwedzi wa Phando nga murahu ha mitambo ya Africa Cup of Nations.

• VHALANI HAFHU :Vho-Prof Ngubane vho amba mutambi wa Chiefs sa a si na nungo

Mbokazi ndi munwe wa vhatambi vhane vha fulufhelwa vhukuma kha thimu ya mugudisi wa Orlando pirates Abdeslam Ouaddou na kha Bafana Bafana.