Kwinika u toḓa Chiefs i tshi sedza kha u muṱaṱisano kha ligi

Mutsireledzi wa thimu ya Kaizer Chiefs Zitha Kwinika o humbela vhatambi ngae uri vha sedzese kha mitambo ya Betway Premiership ino vhege.

Tshigwada tsha Naturena tshi na mitambo mivhili ya ligi ine ya tea u tamba musi tshifhinga tsha u awela tsha Afcon tshi sa athu thoma uno nwedzi.

Vha dalela Chippa United Tshitediamu tsha Nelson Mandela Bay ngei Gqeberha nga Ḽavhuraru – u thoma ha mitambo ndi nga 7.30 nga madekwana.

Vha do kona u vala nwaha nga munwe mutambo wa hayani na TS Galaxy stadium tsha Mbombela nga Swondaha nga masiari.

Sa vhunga hu na nwedzi u ṱoḓaho u vha muthihi vha sa athu tamba mutambo wa ligi zwino, Zitha Kwinika u tenda uri thimu i tea u fara nga maanḓa.

Kaizer chiefs yo vha yo sedza kha mitambo ya khaphu ya confederation ya caf kha vhege dzo fhelaho.

“Lwa u fhedzisela ro tamba kha ligi ya nṱhesa ya Betway ro vha ri tshi tamba na Orbit College,” ho amba Kwinika ino vhege.

“Ri ḓo tea u ḓiḓowedza ra vhuyelela kha ligi ro khwaṱha ngauri vhege dzo fhiraho ro vha ro sedza kha Caf.

“Zwino ri ḓo tamba na Chippa nnḓa ha PE nahone u ḓo vha mutambo u konḓaho – zwi dzula zwi tshi konḓa u tamba na Chippa.

“Ndo vha vhona kha mutambo wavho wa u fhedzisela, vha na tshigwada tshavhuḓi ngauralo u ḓo vha mushumo u konḓaho fhedzi ndi vhona u nga ro ḓilugisela ngauri ro vhona nḓila ine vha tamba ngayo.

“Ro vhona nḓila ine vha ḓifara ngayo musi vha si na zwithu kana musi vhe na zwithu.

“Ro zwi vhona uri ndi thimu ine ya vha na vhuhali nahone vha nga dzula murahu vha ni ṱhasela nga milenzhe yavho. Ngauralo ee, ri khou ḓilugisela zwenezwo.”

• VHALANI HAFHU: Pirates, Chiefs na Sundowns vho kundelwa u wina

Chiefs i do vha i tshi khou fulufhela u kuvhanganya poindi dza 6 kha mitambo yayo mivhili yo fhelaho uno nwaha uri i sa sale murahu kha mbambe ya u dzhia tshiphuga.