Ndah o takala nga Pirates yo wina Carling Cup
Mutsireledzi wa Orlando Pirates Olisa Ndah ha ngo kona u dzumba dakalo ḽawe nga murahu ha musi o vhuya kha huvhala na u takula tshiṅwe tshiphuga.
Ndah o swaya u vhuya hawe musi Pirates i tshi kunda Carling All Stars nga 2-0 kha khaphu ya Carling tshitediamu tsha Moses Mabhida.
Mutambi wa murahu wa Nigeria o vha a sa tsha tamba u bva nga ṅwedzi wa Tshimedzi nga murahu ha u huvhala musi a tshi tamba na Polokwane City.
Mutambo wa Mugivhela wo vha u wa u thoma a tshi tamba kha muṱaṱisano nga murahu ha miṅwedzi yo vhalaho.
Naho Carling Cup yo dzhiiwa sa ya vhukonani, gundo ḽo vha ḽi na ṱhalutshedzo khulwane kha Pirates.
Thimu ya All Stars yo khethiwa nga vhatikedzi, zwa engedza dakalo kha mutambo.
Gundo ḽo ita uri Pirates i wane khaphu ya vhuraru kha khalanwaha.
Zwino vho engedza khaphu ya Carling kha zwiphuga zwe vhavha vha nazwo zwa MTN8 na Carling Knockout.
“Ri dzulela u ita ḓivhazwakale tshifhinga tshoṱhe,” ho amba Ndah nga murahu ha musi ho no lila tshipiriri tsha u fhedzisela.
“Ri anzela u wina zwoṱhe nahone ndi tshone tshithu tsha ndeme vhukuma zwa zwino. “Ndi tshifhinga tsha uri ri ḓiphine na u pembelela.”
U vhuya ha Ndah ho khwaṱhiswa nga u vhuya ha Thabiso Sesane nga murahu ha u huvhala ha Achilles lwa tshifhinga tshilapfu.
Sesane o vha a sa tsha tamba ubva nga nwedzi wa Fulwi nga murahu ha u huvhala musi a tshi tamba na Sekhukhune United.
Vhatikedzi vha Pirates vho dovha vha vhona u tamba ha u thoma hu takadzaho u bva kha mutambi wa phanḓa muswa Sifiso Luthuli.
Luthuli o vula tshikoro kha hafu ya u thoma. Boitumelo Radiopane o khwaṱhisa gundo nga miniti wa vhu 80 nga u fhedza nga u dzika.
