Broos o eletshedza Sundowns kha u wina ligi ya dzi ngwenya
Mugudisi wa thimu ya Bafana Bafana Vho-Hugo Broos vhari thimu ya Mamelodi sundowns i tea u ita tshanduko khulwane arali i tshi khou toda u wina ligi ya dzi ngwenya ya CAF hafhu.
Broos o vha a tshi tenda uri Sundowns i nga kunda Pyramids FC, fhedzi hezwo a zwo ngo itea.
Sundowns yo kundwa nga 2-1 kha mutambo wa vhuvhili wa u fhedzisela nga Swondaha ngei Cairo.
Mvelelo yo vha i tshi amba u kundwa nga 3-2 nga u angaredza.Mutambo wa u thoma wo fhela nga 1-1 ngei Pretoria.
Pyramids yo mbo ḓi ranga phanḓa musi Fiston Mayele a tshi kora nga murahu ha phoswo ya mutsireledzi Grant Kekana.
Kha luṱa lwa vhuvhili, Ahmed Samy o engedza kavhili u bva kha tshipiḓa tsho vhewaho. Iqraam Rayners o kokodza nthihi murahu, fhedzi zwo vha zwi songo eḓana.
Sundowns yo vha i tshi ṱoḓa tshiṅwe tshikoro tshithihi u itela u kunda kha mulayo wa zwikoro zwa nnḓa, fhedzi Pyramids yo vha yo khwaṱha.
Vho vha tshigwada tsha vhuṋa tsha Egipita u takusa tshiphuga. Mugudisi wavho Krunoslav Jurčić o khoḓiwa nga nḓila ye a shumisa ngayo vhuṱali.
Broos ari u vhona unga Sundowns ina tshikhala tshihulwane.
“Fhedzi Pyramids a si thimu mmbi,” o ralo. “Kha nṋe, vha khwine u fhira Al Ahly.
“Vha tamba bola ya milenzhe yavhuḓi, vha na vhuhali, nahone vha na vhatambi vha vhuimo ha nṱha.”
Broos o humbula u sevha vhatikedzi phanḓa ha final. “Ndo amba nga Ḽavhuṋa uri zwi ḓo konḓa. Nahone zwo ralo.”
Sundowns yo vha na zwikhala zwo vhalaho kha tshipida tsha vhuvhili. Fhedzi mulindi wa tshipiḓa tsha Pyramids Naser Elshenawi o ita zwithu zwa ndeme vhukuma.
Ho vha hu u kundwa ha vhuvhili ha Sundowns kha u fhedzisela ha CAF League. U wina havho fhedzi ho ḓa nga 2016.
Broos u tenda uri Sundowns i tea u ḓihumbulela. “U bva tshe nda ḓa Afrika Tshipembe, vho no swika kha dzi quarter, dzi semis, zwino kha dzi final.
Translated by Nthaduleni Rolivhuwa
