Kaizer Chiefs a i ngo dzinginyea nga u ṱuwa ha Nabi
nabiMulindi wa tshigwada tsha Kaizer Chiefs Brandon Peterson o bvisela khagala uri nyimele i hani kha tshigwada nga murahu ha u tuwa ha mugudisi Nasreddine Nabi nga u ṱavhanya.
Mutambi wa Tunisia o fhandekana na Kaizer Chiefs nga murahu ha musi ho bvelela mavharivhari a uri ṱhanziela dzawe dza u gudisa ndi dza mazwifhi.
Hezwi zwo vha zwi tshi khou amba uri o vha a sa tendelwi u dzula kha bannga musi hu tshi khou tamba mitambo ya Caf Confederation Cup.
Nasreddine Nabi o vha o fhelisa gomelelo ḽa Kaizer Chiefs ḽa miṅwaha minzhi ḽa u dzhia khaphu na khaphu ya Caf nga u wina khaphu ya Nedbank kha khalanwaha yo fhiraho.
Mathomoni a ino khalanwaha, Nasreddine Nabi – ane a vha na miṅwaha ya 60 – o xelelwa nga mitambo miraru ya u thoma ya Kaizer Chiefs kha ligi ya nṱhesa ya Betway.
Hezwi zwo vha zwi tshi khou itiswa nga nyimele ya shishi ye a vha a tshi khou tea u i ṱhogomela hayani ngei Tunisia.
- VHA RI WANA KHA FACEBOOK| facebook.com/profile.
Musi a tshi vhuya, o ranga phanḓa thimu ya ita draw na Mamelodi Sundowns, ya kunda Golden Arrows na u kundwa nga 3-1 nga Sekhukhune United.
Nga murahu ha u kundwa honoho, Nasreddine Nabi o vha a siho fhethu he thimu ya vha i tshi khou gudiswa hone musi i tshi khou dzudzanyela mutambo wa Tshiphuga tsha Confederation na Kabuscorp ya Angola.
Musi vha tshi khou amba nga murahu ha u ṱangana ha Carling Knockout ino vhege, Vho-Petersen vho khwaṱhisedza u ṱuwa ha mugudisi.
Fhedzi o ombedzela uri thimu a i khou vhilaela nga ha u ṱuwa hawe sa izwi pulane dzi tshi tea u bvela phanḓa.
“Hezwi zwi itea kha bola ya milenzhe – vhagudisi vha a ḓa vha ṱuwa, vhatambi vha a ḓa vha ṱuwa,” ho amba Petersen.
“Ri nga si kone u sedza nga maanḓa kha zwenezwo. Zwi tou vha khagala uri a si zwavhuḓi u xelelwa nga mugudisi. Fhedzi mafheleloni a ḓuvha, ri na mushumo une ra fanela u u ita.”
“Ri na mitambo ine ra tea u i tamba, ngauralo ri nga si hangwe u sedza kha zwe zwa itea. Ngauri tshithu tsha ndeme vhukuma na tshithu tsha u thoma mihumbuloni ya vhatambi ndi mushumo une wa tea u itwa.”
“Ri na vhuḓifhinduleli ha u bvela nnḓa ra tamba nga nungo dzoṱhe kha mutambo muṅwe na muṅwe, u shumisa tshikhala tshiṅwe na tshiṅwe tshine ra tshi wana.
“Zwino, tshipikwa tshihulwane kha riṋe zwino ndi Ḽavhuraru ngauri ri na mutambo une wa khou ḓa (na Marumo Gallants).
“Ngauralo, mushumo washu ndi u lugisa zwine zwa tea u lugiswa na u isa phanḓa na u gidima hashu havhuḓi.”
Translated by Nthaduleni Rolivhuwa
