Cardoso o amba nga ha u huvhala ha Themba Zwane
Cardoso o amba nga ha u huvhala ha Themba Zwane.
Dakalo ḽa u kunda Magesi FC nga 3-0 ḽo ṱangana na masindambilu kha Mamelodi Sundowns nga murahu ha musi mutambi wa vhukati Themba “Mshishi” Zwane a sa tsha tamba nga ṅwambo wa u huvhala.
U huvhala ha mutambi ane a dzulela u takalelwa zwo vhanga mbilaelo vhukati ha vhatikedzi vha kiḽaba, zwihulusa ro sedza ḓivhazwakale ya mutambi uyu ya u huvhala.
Mugudisi muhulwane Vho-Miguel Cardoso vho tenda uri vha kha di vha swiswini nga ha vhuhulwane ha mafuvhalo hawe kha tshifhinga hetshi.
“Ri kha ḓi ḓo ḓivha zwavhuḓi uri ho itea mini,” ndi mugudisi we a vhudza zwiṱitshi zwa TV nga murahu ha mutambo.
“U bva kha zwine nda vha nazwo zwa zwino u bva kha madokotela, a zwi tsha fana na kale.”
Maipfi a mugudisi wa Portugal ndi ndingedzo i re khagala ya u fhungudza nyofho,
Fhedzi a dovha a sumbedza u sa vha na vhungoho ho ṱanganaho na muṅwe wa vhatambi vhawe vha ndeme vhukuma.
Themba Zwane ane avha na divhazwakale ya u huvhala vhukuma o dzhena kha hafu ya vhuvhili ya mutambo, a dzhena vhudzuloni ha Kutlwano Letlhaku nga miniti ya vhu 63.
O vha e mudavhini lwa tshifhinga tshiṱuku a sa athu kombetshedzwa u bva nga ṅwambo wa vhulwadze.
O vha a tshi vhonala o dinalea na u vhilaela musi a tshi bva luvhanḓeni.
A si lwa u thoma Themba Zwane a tshi sedzana na thaidzo dzi dinaho dza u huvhala.
U kha di tamba nga ndifhedzo ngauri u kha di tou bva u fhola kha vhulwadze he ha ita uri a si kone u tamba lwa tshifhinga tshilapfu.
Kha Sundowns, Themba Zwane o linganelaho ndi wa ndeme vhukuma. U kwamea hawe kha thimu a hu linganyisei.
Vhuṱali hawe vhu a ṱoḓea kha thimu nga maanḓa ngauri vho xelelwa nga Lucas Ribeiro we a ṱuwa nga u ṱavhanya.
Team na vhatikedzi vhayo vha do vha vha tshi khou fulufhela uri Zwane ha ngo huvhala vhukuma kha tshifhinga hetshi,
Na uri u do fhola nga u tavhanya uri a kone u vhuyelela mudavhini hu si kale.
“Kha ri fulufhele uri a si mafhungo mahulwane, kha ri fulufhele nga u ralo,” ndi Cardoso a tshi phetha.
Translated by Nthaduleni Rolivhuwa
