Tshabalala o livha Mexico u tamba na vhahali

Mutambi wa kale wa Kaizer Chiefs na Bafana Bafana Siphiwe Tshabalala u do ya Mexico u shela mulenzhe kha mutambo wa vhahali.

Tshabalala o nangiwa kha tshigwada tsha vhatambi vha ḓivheaho vha ḽifhasi kha mutambo une wa ḓo tambelwa ngei Monterrey, Mexico nga Mugivhela wa ḽa 17 Phando.

Mutambi wa kale wa Kaizer Chiefs o kora tshikoro tsha u thoma tsha Afrika Tshipembe kha mitambo ya u thoma ya Tshiphuga tsha Ḽifhasi Afrika.

Kha mutambo wonoyo, Afrika Tshipembe ḽo ṱangana na Mexico kha mutambo wo ḓalaho mvula we wa fhela nga 1 – 1.

Tshabalala u ḓo vha na tshikhala tsha u tamba khathihi na vhaṅwe vhatambi vha khwine kha ḽifhasi nga tshenetsho tshifhinga, hu tshi katelwa Dida, Alessandro Del Piero, Wesley Sneijder, Sergio Busquets, Xavi, Cafu, Francesco Totti na Carles Puyol.

Thimu iyi i do gudiswa nga mutambi wa kale wa England Fabio Capello.

Mutambo uyu ndi munwe wa mitambo ine ya do tevhela musi hu tshi khou lugiselelwa World Cup ine ya do farwa mafheloni a nwaha.

• VHALANI HAFHU:Andre de Jong o bvisela khagala zwe zwa mu kunga kha Pirates

Sa nga 2010, Afrika Tshipembe ḽi ḓo ṱangana na Mexico kha mutambo wa u vula nahone nga hetshi tshifhinga Mexico ḽi ḓo vha ṋemuṱa wo ṱanganelaho khathihi na United States na Canada.