Ouaddou u amba nga u sa tamba ha Mbokazi madekwe
U sa tamba ha Mbekezeli Mbokazi lwa u tou thoma ino khalanwaha kha thimu ya Orlando Pirates ye ya kunda Chippa United nga 2-0 zwo ṋaṋisa mavharivhari nga ha vhumatshelo ha mutambi uyu.
Ho vha na mavharivhari a uri mutsireledzi muswa u nḓilani ya u ya ha Donald Trump hu si kale.
Mbokazi o vha a siho kha thimu ye ya tamba nga Ḽavhuvhili, nahone mivhigo yo sumbedza uri ndi nga ṅwambo wa uri o vhuya nga murahu ha tshifhinga u bva US he a vha a tshi khou linga na Chicago Fire.
Fhedzi musi mugudisi wa Orlando Pirates Abdeslam Ouaddou a tshi vhudziswa nga ha zwenezwi, o mbo ḓi dzumbama, a amba uri u khou sokou mu awedza sa vhaṅwe.
Vho-Ouaddou vho dzumbulula uri a vha athu vhudzwa nga ha u ya ha Mbekezeli Mbokazi kha thimu ya bola ya milenzhe ya ḽigi khulwane ya Amerika, Chicago Fire.
“Zwine nda nga ni vhudza ndi uri a thi divhi nga ha mafhungo aya, zwine nda zwi divha ndi uri Mbokazi u kha di vha tshipida tsha thimu yanga.
“Ṋamusi, sa zwine nda dzulela u amba, ndi khou shandula vhatambi nahone ndi muṅwe wa vhatambi vha ndeme kha thimu yanga.
“Ngauralo kha nṋe u kha ḓi vha mutambi wanga,” ho amba Ouaddou musi a tshi kombetshedzwa u fhindula fhungo ḽa Mbokazi.
Uya nga ha mivhigo yo phaḓalalaho, Mbekezeli Mbokazi u ḓo ṱuwa Afrika Tshipembe a livha US nga ṅwedzi wa Phando.
U ḓo thoma a tshimbila na thimu ya Bafana Bafana u ya Morocco nga Nyendavhusiku kha Tshiphuga tsha Afcon, sa izwi e muṅwe wa vhatambi vhane vha fulufhelwa nga Hugo Broos.
Mbokazi o thoma u ḓivhea kha Pirates mafheloni a khalanwaha yo fhiraho musi thimu i tshi khou xelelwa nga vhatambi vha ngaho Tapelo Xoki, Olisa Ndah na Thabiso Sesane.
- VHALANI HAFHU: Masilela: Gaston sirino hana vhumatshelo kha chiefs
O mbo ḓi ḓiitela dzina nga u ṱavhanya, a sumbedza u vha mutsireledzi a sa ofhi nahone o khwaṱhaho ane a nga kona u lwa na mufuda naho u ufhio wa muṱhaseli.
