Majoro una lutamo luhulu lwa bola ya milenzhe dzapo

Muḓivhalea wa bola ya milenzhe wapo – we a ita dzina ḽawe kha thimu ya Kaizer Chiefs na Orlando Pirates –Lehloholo Majoro o sumbedzisa lutamo lwawe lwa mveledziso ya bola ya milenzhe kha shango.

Vhari vha khou toda u sedzulusa ndila ine mbekanyamushumo dza mveledziso ya zwikili fhasi ha tshiimiswa tshi langaho bola ya milenzhe Safa dza langiwa ngayo.

“Ndi khou ṱoḓa uri ndaulo ya Safa i vhee phetheni ya Rugby ya Afrika Tshipembe nga u bveledza vhatambi vhaswa u swika vha tshi swika kha vhuimo ha nṱhesa,” ho amba Vho-Majoro.

“Vhatambi vha rugby vha wana vhugudisi u bva musi vhe na miṅwaha ya rathi, vha tshi fhira kha zwipiḓa zwoṱhe zwa vhaṱuku.

“Zwenezwo zwi ita uri vha kone u tamba zwavhuḓi na u imela shango ḽavho nga u ḓiimisela.

“Hu na vhatambi vhanzhi vhane vha tamba bola ya milenzhe kha vhuimo ha fhasi fhedzi vha sa dzhielwe nṱha ngauri a hu na nḓila i re khagala ya u vha ṱalula na u vha bveledza.”

U sa vha hone ha pulane dza Safa dzi re khagala zwo vula vothi ḽa uri vhafhuri vha vule senthara dzavho na u fhura vhana na vhabebi.

Vho-Majoro vho amba uri u sa londa vhatambi vhaswa uhu zwi ita uri vhatambi vha sa ṱalulwe vha tshe vhaṱuku uri vha kone u bveledzwa zwavhuḓi.

Vho ṋea tsumbo ya mutambi wa Orlando Pirates ane a pfi Kamogelo Sebelebele we a dzhena kha bola ya milenzhe a tshe muṱuku.

“Ndo dzhena kha bola ya milenzhe ya phurofeshinaḽa ndi muhulwane sa Kamogelo Sebelebele we a sumbedza uri ndi mutambi wavhuḓi fhedzi a ḓivhiwa ndi muhulwane,” Majoro o isa phanḓa.

• VHALANI HEZWI :‘Ndi khou ṱoḓa u wina tshiphuga na Kaizer Chiefs’ – maboe

Huna vhanwe vhatambi vhanzhi vha re na vhukoni vhe vha tumbulwa vha tshi kha di vha vhahulwane sa Sibongiseni Mthethwa wa Kaizer Chiefs.

Translated by Nthaduleni Rolivhuwa