Mofokeng una fulufhedziso kha vhatikedzi vha Pirates

Relebohile Mofokeng u khou ombedzela uri Orlando pirates yo ita zwavhudi naho yo tambisa zwikhala zwinzhi kha mutambo wayo wa 0-0 na Sekhukhune United.

Pirates yo xelelwa nga tshikhala tshihulwane tsha u ya nṱha ha Betway Premiership nga murahu ha musi yo farwa nga Babina Noko tshitediamu tsha Peter Mokaba nga Mugivhela.

Mvelelo i sia thimu i kha vhuimo ha poindi dza 29  hu khou rangaphanda Mamelodi Sundowns, naho Pirates i tshi kha ḓi vha na mutambo.

LINGEDZANI ZWOTHE .

Musi ri tshi sedza kha vhuleme, Rele Mofokeng o tenda uri ndi ḓuvha ḽe Orlando Pirates ya hanelwa vhudzulo phanḓa ha tshikoro.

“Arali hu si ḓuvha ḽaṋu, a hu na tshine tsha ḓo tshimbila zwavhuḓi. Ro xelelwa nga zwikhala zwinzhi,” ho amba Mofokeng.

“Na musi ndi kha bentshi ndo vha ndi tshi zwi vhona uri ri khou sika zwikhala fhedzi ri sa khou kora zwikoro. Ndo vha ndi tshi sokou pfa uri a si ḓuvha ḽashu.”

Mutambi uyu o amba uri o lingedza u shandula mutambo nga murahu ha musi o no dzhena, fhedzi a khoḓa mulindavhuno wa Sekhukhune nge a gavha  shotho zwavho.

“Fhedzi-ha, ndi vhona u nga ro ita nga hune ra nga kona ngaho nahone ra thoma mutambo zwavhuḓi vhukuma,” ho engedza mutambi.

THUSO UBVA KHA VHAFUNI

Rele Mofokeng o mbo ḓi humbela vhatikedzi vha Orlando Pirates uri vha songo xelelwa nga fulufhelo fhedzi vha ime murahu havho kha tshifhinga tshino tsha ndeme tsha khalanwaha.

“Hafu ya vhuvhili ya khalanwaha ndi ya ndeme vhukuma.Ri ṱoḓa vhatikedzi vhashu nga maanḓa ngauri vha a ri ṱuṱuwedza,” o isa phanḓa.

“Ri khou ṱoḓa uri vha bve nga vhunzhi, nahone ri tenda uri ri ḓo vha takadza kha mitambo i ḓaho.”

• VHALANI HAFHU: Yo vha i tsheo i konḓaho, fhedzi ya vhuphurofeshinaḽa, Mako

Kha mutambo wavho u tevhelaho nga Mugivhela, Pirates i do sedza u kuvhanganya poindi dzo fhelelaho nga u kunda Magesi FC hayani tshitediamu tsha Orlando.