Mngqithi o neta nga Chiefs i no khou pembelela ‘u wina nga vhufhura’
Manqoba Mngqithi o sala o sinyuwa nahone a amba uri Kaizer Chiefs yo furela musi i tshi kora kha mutambo wayo na Golden Arrows.
Kaizer chiefs yo kunda Arrows nga 1-0 kha mutambo wa Betway Premiership stadium tsha FNB nga Lavhuvhili vhusiku.
Fhedzi Mngqithi o sala o vhaisala, hu si nga ṅwambo wa u kundwa, fhedzi nga ṅwambo wa nḓila ye zwa itea ngayo.
TSHIKORO TSHA TSHIOFISI.
O vhona uri tshikoro tsho dzheniswaho nga Aden McCarthy tsho vha tsho fanela u sa tendelwa nga vho malugwane sa izwi o kora e kha vhuimo hu songo tendelwaho(offside).
“Tshithu tsha u thoma tshine nda nga amba ndi tsha uri PSL i ḓo vha khakhathini lwa tshoṱhe arali fhedzi mafhungo a VAR a sa athu dzudzanywa,” ho amba Mngqithi.
“Ri khou shuma nga maanḓa u fhaṱa thimu dzashu. Arali ni tshi ṱoḓa u vhona uri tshikoro itshi tsho vha tshi songo tea, sedzani hune Silva a kwama bola hone, McCarthy o vha o no vha murahu, u fhethu hune a songo fanela u vha hone.
“Fhedzi ngoho ndi ya uri PSL i tea u dzhia vhukando kha mafhungo a VAR, bola ya milenzhe yo shanduka vhukuma zwino.”
A HU KHOU SOLIWA MALUGWANE
Vho-Mngqithi vhari vha nga si sole malugwane ngauri ndi muthu nahone vha kundelwa u tshimbila na zwine zwa khou itea mudavhini sa izwi bola ya milenzhe zwino i tshi khou ṱavhanya.
“Zwino ri tea u humbula u sedza kha hetshi tshithu tsha VAR ngauri arali ra sa ralo ri do isa phanda na u kundwa nga ndila i fanaho vhathu vha nga si vhe na thaidzo.”
Fhungo la VAR ndi kale li tshi khou ambiwa kha bola ya milenzhe ya hayani nahone hu khou fulufhedziswa uri li do divhadzwa kha bola ya milenzhe ya hayani.
Hu khou lavhelelwa uri i nga thoma kha khalanwaha i ḓaho, u ya nga vha muhasho wa mitambo.
