Broos u talutshedza zwine a zwi toda kha mutambi wa Bafana Bafana
Tshifhinga tshoṱhe musi mugudisi wa Bafana Bafana Hugo Broos a tshi nanga tshigwada tshawe, hu vha na mbudziso – hu nga vha nga ha vhatambi vhe a vha sia nnḓa kana vhe a vha nanga.
Tshigwada tshawe tsha zwenezwino – tsho khethiwaho kha mutambo wa vhukonani na Zambia nga Mugivhela – na tshone tsho vusa mbudziso naho o ṱalutshedza, vhaṅwe vha kha ḓi vha vha songo fushea.
Vho-Hugo Broos vho vhudziswa nga Musumbuluwo uri vha talutshedze uri vha sedza mini musi vha tshi nanga mutambi wa Bafana Bafana.
“Ndi mini zwine nda zwi ṱoḓa kha mutambi? Tsha u thoma, vhuimo hawe – vhukuma,” ho amba mugudisi o bebwaho Belgium.
“Arali u si kha vhuimo ho teaho, a wo ngo tea u ḓa kha Bafana Bafana.Nga murahu ndi muhumbulo.
“Hezwo na zwone ndi zwa ndeme vhukuma.Ndi ngazwo ri tshi ya u ṱalela mitambo, ri sedza vhukoni na uri mutambi o ḓiimisela hani.
“Sa tsumbo, arali o rwiwa nga milenzhe a wa, zwi mu dzhia tshifhinga tshingafhani uri a takuwe a ḓi-takule.
“Arali a dzhia tshifhinga tshilapfu, zwenezwo u nga zwi vhona uri hoyu a si mutambi ane ra khou mu ṱoḓa.
“Tsha vhuraru, ri sedza uri u ṱangana hani na vhaṅwe vhatambi vha re kha thimu musi ro no mu nanga uri ri kone u mu vhona tsini.
“Hezwi ndi ngauri naho thimu i tshi khou tshimbila hani, arali hu na muthu muthihi ane a si vhe na muya wo teaho kha thimu, zwenezwo zwoṱhe zwi ḓo vha khakhathini.”
- VHALANI HAFHU : Khenyeza o vhuya kha PSL, u do gudisa inwe ya thimu
Bafana i ḓo ṱangana na Zambia ngei Tshitediamu tsha Nelson Mandela Bay kha mutambo wayo wa u fhedzisela phanḓa ha Tshiphuga tsha Dzitshaka tsha Caf Africa ngei Morocco nga Nyendavhusiku.
