Hezwi ndi mathomo, u ralo Ouaddou wa Orlando Pirates
Mugudisi wa Orlando Pirates Vho-Abdeslam Ouaddou vhari zwi kha di vha zwituku u haṱula nḓila ine vha tamba ngayo kha tshigwada.
Hezwi zwi khou ḓa musi Ouaddou a tshi khou wana tsedzuluso dzo fhambanaho nga murahu ha musi o ranga phanḓa Orlando Pirates kha mutambo wa vhuvhili wa u fhedzisela wa ligi nga murahu ha miṅwedzi miṱanu a tshi khou langa.
Pirates yo kunda Richards Bay FC nga 1-0 kha mutambo wa semi-fainala wa Carling Knockout ngei tshitediamu tsha Moses Mabhida mafheloni a vhege.
Gundo ḽo ḓa nga nṱhani ha tshikoro tsha Tshepang Moremi, ane zwino o no kora zwikoro zwa 8 kha miṱaṱisano yoṱhe ya ino khalanwaha.
“Ndi vhona unga zwi kha ḓi vha zwiṱuku u haṱula nḓila ine nda tamba ngayo fhano,” ho amba Ouaddou, we a dzhia vhudzulo ha Jose Riveiro mathomoni a khalanwaha.
“Ndi ḓo haṱulwa musi khalanwaha i tshi fhela.Ndi kha ḓi vha mathomoni. Kha mushumo hoyu, u fanela u ḓiṱukufhadza tshifhinga tshoṱhe.
“Lutamo lwashu ndi u ita zwavhuḓi kha mutambo muṅwe na muṅwe une ra u tamba.”
Ouaddou o khoḓa vhatambi vhawe nga u ḓiimisela havho na vhuḓifari havhuḓi.
- vhari wana kha facebook| Mitamboyashu.co.za
Vho amba uri thimu yo bvelela kha u swikelela zwipikwa zwayo musi vha tshi dalela Durban.
“Ndi vhona u nga vhatambi vhanga vho vha vhe na tshivhindi; vho sumbedza u konḓelela ṋamusi, nahone ndi fanela u vha fhululedza nga zwenezwo,” ho amba mugudisi.
“Mushumo washu wa u ḓa Durban wo vha u wa u dzhia phoindi tharu kha Golden Arrows ra swika kha mutambo wa u fhedzisela wa Carling Cup — nahone ro ita zwenezwo.
“Yo vha vhege yavhudi kha rine. Zwino ri tea u isa phanda na muya hoyu wa thimu,” ho engedza mugudisi wa Morocco.
“Ndi livhuha vhukuma muya wa tshigwada, vhuthihi, na u tevhela pulane ya mutambo u bva kha vhatukana vhashu.
“Arali ra bvela phanḓa nga heyi nḓila, ri nga lavhelela zwithu zwihulwane tshifhingani tshi ḓaho.”
- VHALANI HAFHU : Sekgota o amba nga ha lwendo lwawe lwa u di vusuludza
Orlando Pirates i ḓo ṱangana na Chippa United kha mutambo wa ḽigi tshitediamu tsha Orlando nga ḽa 25 Lara.
