‘Litshani u sasaladza vhatambi vhashu,’ hu kaidzwa Broos  

Mutambi wa kale wa AmaZulu FC Vho-Thabo “Dona” Mabaso vho humbela mugudisi wa Bafana Bafana Vho-Hugo Broos uri vha litshe u amba zwithu zwi si zwavhuḓi nga ha vhatambi vhane vha sa vha ṱoḓe kha thimu yavho.

Mabaso u tenda uri Hugo Broos ha khou  ṱhonifha nga nḓila ine a amba ngayo.

O amba uri zwithu zwine a amba zwi khou nyadzisa vhatambi na thimu nahone u khou ṱoḓa uri a litshe nḓowelo yawe.

“Hoyu mukalaha u tea u litsha zwine a khou ita,” Mabaso o ṅwala kha Facebook nga Ḽavhuraru.

“A ni khethi vhatambi vha Kaizer Chiefs kana muṅwe mutambi, zwo luga. Fhedzi litshani u amba nga havho kana u dzhiela fhasi thimu dzavho.

“Mushumo waṋu ndi u gudisa thimu ya lushaka – sedzani kha zwenezwo.Litshani u tshinyadza vhatambi kana thimu dzashu.

• vhari wana kha facebook| Mitamboyashu.co.za

“U fanela u humbela pfarelo kha Gift Links na Thembinkosi Lorch arali a murangaphanḓa wa vhukuma.”

Hugo Broos vhari Lorch o fhira tshifhinga tshawe kha Bafana, vhari Links ha khou swika kha tshiimo tshine tsha ṱoḓea kha mutambi wa Bafana.

Vho-Thabo Mabaso vho humbela mugudisi uri vha songo tshikafhadza mushumo wavhudi we vha u itela Bafana nga u amba zwithu zwi vhaisaho na zwi sa ṱoḓei.

“Vharangaphanḓa a vha iti zwine vha ita. Zwiṅwe na zwiṅwe zwine na amba – hu nga vha ngoho kana mazwifhi – a si fhethu haṋu,” Mabaso o bvela phanḓa.

“Ndi mushumo waṋu u shumana na thimu ya lushaka na u lavhelesa thimu ṱhukhu dza lushaka u vhona uri hu na mvelaphanḓa.”

“Nga hezwi zwithu zwine na zwi amba, ni khou bvisa ndeme ya u bvelela hune na khou hu swikelela mudavhini na Bafana.

“Ndi khou humbela uri ni sedze kha thimu ni litshe u sasaladza vhatambi vhashu vha Afrika Tshipembe.”

Zwazwino Bafana vha kha camp vha tshi khou lugisela mutambo wa vhukonani na Zambia ngei Gqeberha nga Mugivhela nga madekwana.

Mutambo u do farelwa tshitediamu tsha Nelson Mandela Bay nahone u do thoma nga awara ya vhurathi nga madekwana.

• VHALANI HAFHU: Maela o bula mutambi ane a khou shuma zwavhudi kha PSL zwino

Ndi mutambo wa u fhedzisela phanḓa ha musi mitambo ya tshiphuga tsha dzitshaka ya Caf Africa (Afcon) i sa athu thoma.