Hugo Broos o bula tshigwada tshawe tsha u fhedzisela tsha Afcon

Mugudisi wa Bafana Bafana Vho-Hugo Broos vho tenda uri u nanga tshigwada tsha u fhedzisela tsha vhatambi vha 25 vhane vha ḓo ya kha mitambo ya Caf Africa Cup of Nations (Afcon) zwo vha mushumo u konḓaho.

O thoma a nanga vhatambi vha 54 vhane khavho o tea u nanga vha 25 vhane vha do ya Morocco mafheloni a uno nwedzi u tamba kha Afcon.

“Tshithu tsha u thoma tshine na tshi ṱoḓa ndi u vha na mutevhe muhulwane wa vhatambi uri ni vhe na nomboro khulwane ine na nga nanga khayo,” Broos o ralo nga Musumbuluwo.

Vho vha vha tshi khou amba kha SABC 1 Laduma vha hayani havho ngei Belgium hune vha vha kha holodei phanḓa ha thonamennde yo lavhelelwaho vhukuma.

“Fhedzi arali u tshi tea u bva kha 54 u ya kha 25, zwi amba u xelelwa nga vhatambi vha 30. Vhenevho vhatambi vhoṱhe vha ṱoḓa u ya Afcon.

“Zwo vha zwi songo leluwa. Kha  ḽinwe sia zwo vha zwo leluwa, fhedzi kha zwiṅwe nṋe na Helma ro vha ri tshi fanela u dzhia tshifhinga tshinzhi tsha u humbula nga hazwo.”

Hugo Broos o dovha a bvisela khagala uri vhatambi vha Orlando Pirates vhe a vha nanga kha tshigwada tshawe tsha u fhedzisela vha do fhiwa duvha lithihi kana mavhili a u awela vha sa athu dzhena kha tshigwada tsha Bafana.

Pirates i do tamba mutambo wa u fhedzisela wa Carling Knockout Cup na Marumo Gallants nga Mugivhela nga masiari tshitediamu tsha Peter Mokaba ngei Polokwane.

“Vhatambi vha Orlando Pirates vha nga fhiwa maṅwe maḓuvha a si gathi a u awela ngauri vha ḓo vha vho no tamba nga Mugivhela.

“Fhedzi nga Ḽavhuraru kana Ḽavhuṋa ri khou ṱoḓa uri thimu yoṱhe i thome u ḓilugisela.Ri fulufhela uri ri ḓo wana mukhaedu ane a ḓo tamba nae nga dzi  17 Nyendavhusiku,” ho amba Broos.

• VHALANI HAFHU: Zamalek yo swikisa mbilaelo kha CAF nga murahu ha mutambo wa Chiefs

Broos o ṋea madzina a thimu yawe nga heyi nḓila, zwine a zwi timatimisi zwi ḓo tevhelwa nga khanedzano sa izwi hu na vhatambi vhe vha siiwa nnḓa nahone vho vha vho lavhelelwa u dzhena.

• Vhalindavhuno: Vho-Williams, Goss, Chaine
• Vhatsireledzi: Mudau, Sibisi, Mbokazi, Modiba, Matuludi, Ngezana, Ndamane, Kabini, Smith
• Vhatambi vha vhukati: Mokoena, Mbatha, Aubass, Sithole
• Vhatambi vha phanḓa: Nkota, Mokwana, Mbule, Mofokeng, Apollis, Moremi, Campbell, Foster, Makgopa