Andre de Jong o bvisela khagala zwe zwa mu kunga kha Pirates

Mutambi muswa wa Orlando Pirates, Andre de Jong, o bvisela khagala zwe zwa ita uri a ṱanganedze mushumo arali tshigwada tsha mu ṋea mushumo.

Andre de Jong ndi munwe wa vhatambi vhararu vhe Orlando Pirates ya khwathisa tshigwada ngavho ubva tshe ha vula fasitere la u rengisa vhatambi vhukati ha khalanwaha.

O dzhena a tshi bva kha Stellenbosch FC, he a vha e hone lwa tshifhinga tshilapfu. O vha a tshi tevhelwa nga tsini nga Daniel Msendami na Mpho Chabatsane vha bvaho Marumo Gallants.

“Ndo takala vhukuma u dzhena kha Orlando Pirates.Zwi dzula zwi tshi konḓa u shandukisa thimu nga ṅwedzi wa Phando,” ho amba De Jong.

“Fhedzi ndo lavhelela u wana mitambo na u shela mulenzhe kha u bvelela ha thimu.

“Musi ndi Stellenbosch ro tamba dzi final dzi si gathi na Pirates nahone ra kundwa henefho.

Mutambi wa New Zealand wa miṅwaha ya 29 o engedza nga uri: “Musi ndi tshi pfa uri Pirates i khou nṱoḓa, ndo takala vhukuma.”

U amba uri u ṱuwa uhu ndi ha ndeme vhukuma kha bola yawe ya milenzhe sa izwi zwi tshi mu ṋea tshikhala tsha u ḓilinga kha thimu khulwane, a tshi lwela zwiphuga.

O bvela phanḓa a ri: “Heyi ndi ndima i takadzaho vhukuma.” “Pirates yo sumbedza u bvelela nahone ndi fulufhela uri ndi nga shela mulenzhe khazwo zwi tshi ya phanḓa.

“Ndi zwithu zwo ḓaho kha vhege dzo fhiraho… Zwo vha zwi tshi konḓa nga tshifhinga tsha u awela tsha vhukati ha khalanwaha, ri khou lingedza u vhuyelela hune ra vha hone.”

Sa vhunga o swika kha All Blacks a fhiwa nomboro ye Monnapule Saleng a i shumisa, u a zwidivha uri hu lavhelelwa zwinzhi khae.

“Ndi lutamo lwa muṅwe na muṅwe fhano u wina ligi ino khalanwaha.Ri na tshikhala tshavhuḓi sa izwi ro dzula nṱha zwa zwino.

• VHALANI HAFHU: Kiḽaba ya Mbokazi yo kunda Chiefs kha Dithejane 

Andre de Jong o phetha nga ḽa uri u ṱoḓa u ṱavhanya u ḓowela sisiṱeme ya Orlando Pirates u itela uri a kone u shela mulenzhe kha u bvelela ha thimu.