AmaZulu yo wana mbuelo nga u saina vhatambi vhaswa
Vhatambi vhavhili vhaswa vha ḓo ita uri AmaZulu FC i vhe khwine u ya nga mugudisi Vho-Arthur “10111” Zwane vhane vha ri vhatambi vha ḓo engedza vhuimo kha thimu yavho.
Vhatambi vhavhili vhaswa vha vhukati, Liam Bern na Langelihle Mhlongo, vho ṱaluswa sa vhatambi vha maimo a nṱha vhane vha ḓo “khwaṱhisa Usuthu nga u ṱavhanya”.
Bern (22) o sainiwa musi khalanwaha i sa athu thoma, fhedzi AmaZulu yo vha i sa koni u tamba nae sa izwi Cape Town Spurs yo vha i tshi khou hanedza u fhiriselwa hawe mahala.
Vha PSL’s Dispute Resolution Chamber vho khwaṱhisedza uri AmaZulu i nga mu tambisa nahone u khou lavhelelwa u tamba mutambo wawe wa u thoma nga Mugivhela musi vha tshi tamba na Siwelele FC tshitediamu tsha Moses Mabhida.
Mhlongo (24) na ene o dzhena kha tshigwada nga mahala nga murahu ha musi o fhambana na tshigwada tsha Richards Bay FC mafheloni a khalanwaha yo fhiraho.
“Ndi vhatambi vhavhuḓi, vhatambi vha maimo a nṱha,” Zwane o vhudza vhoramafhungo ngei Durban ino vhege.
“Ro vha ri tshi vha ṱoḓa kale, fhedzi a zwo ngo itea nga nḓila ye ra vha ri tshi khou ṱoḓa ngayo. Ro sokou takala uri vho fhedza vho swika.
“Vha ḓo engedza ndeme ngauri vha na vhukoni vhune ra vhu ṱoḓa – vhuvhili havho,” ho engedza mutambi wa kale wa Kaizer Chiefs na mugudisi.
AmaZulu yo wina mitambo mitanu, ya kundwa miraru na u ita draw miraru kha mitambo yayo ya u thoma ya 11 ya ligi ino khalanwaha.
Zwane o tenda uri mathomo o vha a si avhudi, a tshi amba nga ha poindi dze vha dzi wisa kha mitambo ye vha vha vha songo fanela u kundwa.
Muṅwe wa mitambo yeneyo wo vha wa u fhedzisela, musi vha tshi kundwa nga Polokwane City nga 1-0 hayani phanḓa ha tshifhinga tsha u awela tsha Fifa.
“Hu na mitambo ine ra nga vha ro ita khwine, nga maanḓa arali ro thoma ra kora fhedzi ra fhedza ri songo wina,” ho amba Zwane.
- VHALANI HAFHU: Vhatambi vha Chiefs vhe vha vha vho huvhala vho vhuya
Zwane u khou ṱoḓa phoindi dzo fhelelaho kha mitambo yayo miraru ya u fhedzisela ya khalanwaha — na Siwelele, Richards Bay na Golden Arrows — phanḓa ha tshifhinga tsha u awela tsha Afcon.
