Mlambo o sasaladza  mugudisi wawe wa kale Sead Ramovic

Mufunwa wa kale wa vhatikedzi vha Orlando Pirates Xola Mlambo o sasaladza mugudisi wawe wa kale wa TS Galaxy Sead Ramovic, a tshi ri u khadi shaya ndivho nnzhi.

Xola Mlambo o vha a tshi khou amba kha mbekanyamushumo ya mitambo ya Metro FM na Andile he a vhudziswa nga ha Ramovic.

Hezwi zwo ḓa nga murahu ha musi CR Belouizdad ya Ramovic yo kundwa nga MC Alger wa Rulani Mokwena vhege yo fhiraho.

“A si uri a thi mu funi… Fhedzi ndi nga ha milayo,” ho amba Mlambo.

“Arali no vha ni tshi nga vhea Rulani na Sead fhano, ndi nga nanga Rulani ḓuvha ḽiṅwe na ḽiṅwe ngauri o ṱalifha nahone u  thekhinikhala. U a pulana na u ita zwithu zwavhuḓi…

“A thi funi u amba nga ha vhagudisi fhedzi tshiṅwe tshiitea tshine nda nga ni vhudza nga hatsho ndi tshiṅwe tshifhinga musi ri lufherani lwa u tshintshela na Sead.

“Ho vha hu half-time nahone thimu yo vha i fhasi ha mutsiko, zwe a amba ndi uri, ‘vhatukana, ri kha ḓi vha na miniti ya 45’.

“Izwo zwi amba mini?, zwi ni vhudza nga ha vhuimo ha mugudisi we a vha e ene,” ho engedza Xola Mlambo.

O mbo ḓi amba uri Ramovic o ṱaluswa sa mugudisi wa musalauno, ane a ḓivha mushumo wawe nahone ane a pfesesa pulane ya mutambo zwavhuḓi vhukuma.

“Ndo shuma fhasi hawe… Ho vha na tshifhinga tshe ra vhona uri o Google zwithu zwe ra vha ri tshi khou ita gym.Ro vhuya ra ita zwithu zwe Arsenal ya zwi ita.

“Ro vha ro sala ri tshi khou vhudzisana uri, ‘Ro vhona hezwi zwithu zwa u ḓisa zwipikara na u tamba muzika. U ḓo ḓa lini na zwawe’.

“Phanḓa ha mitambo, zwe a vha a tshi ri vhudza zwone ndi uri, ‘vhaṱhannga, ri na 90 minutes, arali ra sa kora tshikoro, a ri nga ḓo kundwa’.

“Ndi zwone zwe a amba fhedzi. Ndi uri sa vhatambi vha bola ri a ofha u amba ngoho ngauri vhaṅwe vhathu vha nga ni vhenga.

“Fhedzi kha nṋe, Zwo luga  u vhengiwa nga u amba ngoho. Ro vha ri tshi tamba ri tshi zwi ḓivha uri ndi nyambedzano dze ra vha ri nadzo.

“Tshiṅwe tshifhinga mudzulatshidulo (Tim Sukazi) o vha a tshi fanela u dzhenelela a amba na mutambi muṅwe na muṅwe,” ho amba Mlambo.

• VHALANI HAFHU : Mafhungo maḓifha  kha Chiefs malugana na Rushwin Dortley

O amba uri o shuma na vhagudisi vha re na vhukoni tshifhingani tsho fhiraho sa Ted Dumitru na Rulani Mokwena vhe vha vha vha tshi ḓivha zwine vha khou ita.