Gavin Hunt o tikedza Steve Barker sa Mugudisi wa Khalanwaha
Mugudisi wa kale wa SuperSport United Vho-Gavin Hunt vho posa thikhedzo yavho murahu ha Steve Barker wa Stellenbosch FC kha pfufho ya Mugudisi wa Khalanwaha.
Musi khalanwaha ya Betway Premiership i tshi khou fhela, khanedzano malugana na pfufho dza PSL dzi khou fhisa.
Iṅwe ya ṱhonifho ya nṱhesa ndi Mugudisi wa Khalanwaha, ye ṅwaha wo fhiraho ya ṋewa Rulani Mokwena wa Mamelodi Sundowns.
Mokwena o ranga phanḓa Sundowns kha fulo ḽine ḽa vha tsini na u fhelela, a kundwa luthihi fhedzi.
Fhedzi Hunt u tenda uri khuliso ya ṅwaha uno i fanela u ya kha Barker.
Musi vha tshi khou amba kha mbekanyamushumo ya MSW ya Metro FM, Vho-Hunt vho zwi bvisela khagala.
“Mugudisi wa Khalanwaha kha nṋe? Steve Barker,” ho amba Hunt.
Barker o livhisa Stellenbosch FC kha u fhedza kha vhuimo ha vhuraru ha ḓivhazwakale.
Kiḽaba yo wina mitambo ya 13 nahone ya kundwa kha mitambo ya rathi fhedzi kha mitambo yayo ya 28 ya ligi.
Ndi Sundowns na Orlando Pirates fhedzi zwe zwa vha zwi na rekhodo dza khwine.
Hunt o khoḓa Barker nga u ita zwimangadzo nga zwishumiswa zwiṱuku.
“U fanela u sedza zwine zwa khou shumiswa na zwine zwa khou itwa,” Hunt o engedza.
“Vho dovha vha vha na khalanwaha yavhuḓi. Vho vha vhe kha final ya cup, vho ita zwavhuḓi kha CAF, nahone vho vha vhe tsini na silverware.”
Stellenbosch yo swika kha mutambo wa u fhedzisela wa MTN8, he ya kundwa nga zwiṱuku.
Kiḽaba yo dovha ya takadza kha miṱaṱisano ya CAF, ya ḓivhea kha mapa wa dzhango.
Hunt o ṋea nyeletshedzo ya uri muhulwane wa Stellies a nga kha ḓi xelelwa nga ṅwambo wa u dzhia sia ha maitele a u haṱula.
Hunt o dovha a sumbedza mbilaelo nga ha uri Barker a nga xelelwa nga vhatambi vha nṱha phanḓa ha musi khalanwaha i ḓaho i tshi thoma.
Naho zwo ralo, o khoḓa u sa shanduka ha tshigwada na u lwa.
Translated by Nthaduleni Rolivhuwa
