Broos o bvisela khagala zwe zwa vhuisa Mudau Chloorkop
Mugudisi wa Bafana Bafana Vho-Hugo Broos vho bvisela khagala nyambedzano dze vha vha nadzo na Khuliso Mudau dze dza ita uri mutambi wa murahu wa Mamelodi Sundowns a humele gym.
Vho amba uri vho dovha vha vha ṱuṱuwedza uri vha ite zwoṱhe zwine vha nga kona u ṱavhanya u tandulula khuḓano yavho na kilabu ya Chloorkop.
Vho-Mudau vho vha vha tshi khou guda na tshigwada sa izwi vho vha vha tshi kha di shuma kha u engedza thendelano nahone zwi vhonala uri a vha na vhushaka havhudi na tshigwada.
O vhuya gym ino vhege fhedzi a sala nnḓa ha tshigwada tsha vhatambi vha 23 vhane Broos a ḓo tamba navho kha dzi qualifiers dza World Cup ṅwedzi u ḓaho.
Broos o khwathisedza uri o thoma a amba na Sundowns a sa athu sendela tsini na mutambi uyu thwii.
“Ndo humbela team uri ndi nga thusa naa, vha tenda, u fhedza hone ndo tangana na Khuliso nda muvhudza uri naho ene o luga kha zwinwe zwithu, o khakha kha zwinwe.
Broos o ṱalutshedza a ri: “Vhunzhi hazwo ndi u litsha u gudiswa.” Mugudisi o bebwaho Belgium o kombetshedza uri u ḓidina kha u gudiswa a si nḓila yo teaho.
“A u tandululi thaidzo nga u sa ya gym.Naho hu na u sa tendelana na thimu, u ya gym ndi mulayo.
“U nga si sokou litsha u tamba, u fanela u ḓi gudisa,” ho engedza Broos.
Mudau o vhuya gym, Broos u na fulufhelo la uri fhungo lawe li do tandululwa nga u ṱavhanya.
“Khuliso ndi mutambi wa murahu wa khwinesa wa tsha u ḽa Afrika Tshipembe nahone ndi muṅwe wa vhatambi vha khwinesa Afrika Tshipembe.
“Zwi a nkonḓela u mu litsha nnḓa, ndi ngazwo ndo vhona uri ndi mushumo wanga u lingedza na u thusa u tandulula thaidzo ine a vha nayo,” ho amba Broos.
- VHALANI HAFHU : Vha Chiefs vha humbela Shalulile uri a dzhene ngei Naturena
Bafana Bafana i thoma fulo ḽayo ḽa u ṱanganela kha Tshiphuga tsha Ḽifhasi musi i tshi tamba na Lesotho phanḓa ha musi i tshi ḓo ṱanganedza Nigeria mathomoni a ṅwedzi wa Tshimedzi.
Translated by Nthaduleni Rolivhuwa
