Duba u onesana na Kaizer Chiefs
Mutambi wa Kaizer Chiefs Wandile Duba o sia vhatikedzi vha tshi khou humbulela nga murahu ha musi o posa mulaedza u sa pfali kha Instagram yawe.
Mulaedza wawe wo vha u tshi khou sumbedza uri u khou onesa, fhedzi ha ngo bvela khagala – zwino zwi vhonala uri a nga vha a tshi khou dzhena kha kilabu ya Saudi Arabia.
Zwi khou vhonala uri tshigwada tsha Al Shabab Riyadh, tshi na dzangalelo kha mutambi muswa uyu sa izwi tshi tshi khou sedza u khwaṱhisa nḓila dzatsho dza u ṱhasela.
Duba o engedza mulilo nga u ṅwala uri: “Ndi khou ṱuwa ❤️✌️🤝”.
Mutambi wa minwaha ya 21, ane a bva Lenasia, Johannesburg, o posa mulaedza kha Instagram Story yawe nga Musumbuluwo, a songo zwi lavhelela.
Duba o tamba mitambo mina nahone o no kora tshikoro tshithihi kha zwiṱanu kha khalanwaha ya Chiefs’.
U sa vha hone hawe kha bench kha mutambo wa mafhelo a vhege – he Chiefs ya kunda Golden Arrows nga 1-0 – zwo dovha zwa ṱuṱuwedza mavharivhari a uri a nga ṱuwa.
Vhatikedzi vha Kings vho thoma u sumbedza mbilaelo dzavho sa izwi ndi kale vho nambatela mutambi uyu ubva tshe a vhuya a vha tamba nga zwifhinga zwi si zwavhuḓi.
Fhedzi zwi vhonala uri tshigwada tsho lifha zwe tsha xelelwa ngazwo nga u saina vhatambi vhavhili vha re na tshenzhemo, Flavio Silva u bva Guinea-Bissau na Etiosa Ighodaro u bva Nigeria.
Duba o vha na khalanwaha ya vhudi kha khalaṅwaha yo fhelaho, o kora zwikoro zwina na u thusa luthihi kha mitambo ya 20.
Zwa zwino vhatikedzi vha Kaizer Chiefs vha do lindela u wana ṱhalutshedzo u bva kha tshigwada arali hu na zwine zwa ḓo itea.
- Vhalani hafhu : Al Ahly yo fhelisa thendelano ya Jose Riveiro
Tshithu tshithihi ndi tsha uri: Vhumatshelo ha Duba vhu ita ṱhoho dza mafhungo dzi fhisago kha bola ya milenzhe ya Afrika Tshipembe ano maḓuvha.
Translated by Nthaduleni Rolivhuwa
