brandon petersen u talutshedza uri ndi ngani chiefs i sa khou saina

 Mulindavhuno wa Kaizer Chiefs Brandon Petersen o amba nga ha u sa vha na nungo dza thimu ngeno vhanwe vha tshi khou farakanea nga u khwathisa zwigwada zwavho.

Kiḽaba ya Naturena yo sia vhatikedzi vhayo vho dinalea musi vha tshi khou vhona dziṅwe thimu dzi tshi khou tambula nga u ṱoḓa vhatambi vhaswa.

Vha Orlando Pirates vho khwathisa tshigwada tshavho nga vhatambi vhararu vhane vha khou fulufhedzisa.

Vho saina Andre de Jong, Daniel Msendami na Mpho Chabatsane musi tshifhinga tsha u rengisa vhatambi vha vhukati ha khalanwaha tshi tshi khou vula.

Vhukando  ha Pirates ho sia vhatikedzi vha Chiefs vha tshi ḓipfa vho sala murahu sa izwi thimu yavho yo vha yo fhumula vhukuma.

Fhedzi Brandon Petersen o sumbedza uri a vho ngo fanela u vhilaela nga ha uri Kaizer Chiefs a i nga ḓo saina muthu nga hetshi tshifhinga.

“Nga nṋe muṋe, ndi vhona u nga musi ri tshi sedza kha khalanwaha, ro ita zwavhuḓi nga vhatambi vhane ra vha navho,” ho amba Petersen.

“Hone a thi vhoni ri tshi vha na thaidzo ya u ya phanḓa na vhatambi vhane ra vha navho kale kha thimu na vhe ra tamba navho kha luta lwa u thoma.

“Ro ita zwavhuḓi, ri khou thivha zwavhuḓi murahu… Mbilaelo i re khagala ine nda i vhona ndi u kundelwa u shumisa zwikhala zwa u kora zwikoro.”

Naho vho saina vhatambi vhanzhi mathomoni a khalanwaha, Chiefs a yo ngo sumbedza vhuhali phanḓa ha mambule.

Kha vhatambi vhaswa vhane vha vha kha thimu ndi Etiosa Ighodaro na Khanyisa Mayo vhane vha vha na tshenzhemo nahone vho vha vha tshi lavhelelwa u ita khwine phanḓa ha tshikoro.

“Ndi na fhulufhelo la uri musi ri tshi khou livha kha mutambo wa Lavhuvhili ri do kona u dzhia zwikoro zwi si gathi.

“Ri ḓo vha ri tshi khou fhaṱa kha zwenezwo ri tshi ya phanḓa kha ino khalanwaha.” Chiefs i do pfana maanda  na Golden Arrows nga Lavhuvhili.

• VHALANI HAFHU: Nzumbululo dzi tshuwisaho nga ha u ṱuwa Mosimane kha Downs

Mutambo wa Betway Premiership u do farelwa FNB Stadium nahone vhatikedzi vha do vha vha tshi khou fulufhela uri zwi do itea sa zwe Petersen a amba zwone.