“Sipho Mbule u do ṱutshela Orlando Pirates hu si kale”- Manyisa

Mutambi wa kale wa Orlando pirates Vho-Oupa Manyisa vha khou tenda uri Sipho Mbule u do ṱuwa kha tshigwada tshino hu si kale.

O bvisela khagala uri Mbule u na zwothe zwine zwa ṱoḓea uri mutambi a kone u bvela phanḓa na u ya Europe.

Sipho Mbule o vusuludza mushumo wawe wa bola ya milenzhe nga murahu ha musi o dzhena kha thimu ya Orlando pirates nga thengiso ya mahala zwi tshi tevhela zwe a ṱuwa kha thimu ya Mamelodi Sundowns.

Naho ho vha na mivhigo yo fhiraho ya thaidzo dza vhuḓifari hawe, vhafuni vha Kaizer Chiefs na Pirates vho sumbedza dzangalelo kha mutambi uyu a re na vhukoni.

Mbule o mangadza vhanzhi nga u ṱavhanya u dzula kha Pirates nahone nga u ṱavhanya a vha mufuniwa nga vha tikedzi u mona na shango.

Mugudisi wa Bafana Bafana Vho-Hugo Broos na vhone vho mu vhuedzedza nga murahu ha minwaha mina a siho.

Vho-Manyisa vho ṱalusa Mbule sa mutambi a re na mpho yo khetheaho a re na vhuṱali vhu songo ḓoweleaho ha bola ya milenzhe.

“U na vhukoni vhuhulwane nahone ndi mutambi o khetheaho vhukuma,” Vho-Manyisa vho amba kha tshiṱirathedzhi tsha YouTube tsha PrimeSports With Forests.

“Ndo vha ndi tshi tamba nae five-a-sides kha Sundowns nahone ndo vha ndi tshi dzulela u vhona zwithu zwo fhambanaho kha bola yawe ya milenzhe,” ho engedza Manyisa.

Manyisa u tenda uri Mbule u a bvelela musi o tingeledzwa nga vhatambi vhane vha ḓiimisela u shuma nga maanḓa na u sika zwikhala zwa uri a shumise vhuṱali hawe.

Vho-Manyisa vha tenda uri u tamba zwavhudi kha Afcon na World Cup zwi nga kunga thimu dza Europe.

“Arali a kha nḓila yavhuḓi kha Afcon na kha World Cup, a thi vhoni a tshi vhuya Afrika Tshipembe, u ḓo ya Yuropa,” Manyisa o ralo.

• VHALANI  HAFHU : Mugudisi wa chiefs o amba nga ha Luke Baartman

“U humbula nga u ṱavhanya musi e na bola nahone u vhona zwithu zwine ra sa zwi vhone, fhedzi u ṱoḓa u kora zwikoro zwinzhi,” ho phetha nga u ralo Vho-Manyisa.