Nabi u pulanela khalaṅwaha i daho vhumatshelo vhu tshi khou timatimisa
Naho vho kundelwa u wana vhuimo ha Top 8, mugudisi muhulwane wa Kaizer Chiefs Vho-Nasreddine Nabi vho ṋea tshumiso yo khwaṱhaho ya uri vha ḓo dzula kha tshigwada.
Vhumatshelo ha Nasreddine Nabi kha Kaizer Chiefs ho vha hu tshi khou ambiwa nga hazwo vhege dzo fhiraho.
Ho vhigwa uri vhalanguli vha kilaba vho vha vha khou toda uri a fhedze a kha Top 8 nahone a vha khou takalela nyimele.
Fhedzi musi vha tshi amba nga murahu ha u ṱangana havho na Polokwane City vha si na zwikoro tshitediamu tsha FNB kha mutambo wavho wa u fhedzisela wa Betway Premiership,
Vho-Nabi vho sedza kha pulane dza khalanwaha i ḓaho.
Vho sumbedzisa uri hu na pulane dza u khwaṱhisa tshigwada u itela u vhona uri hu na mitambo ya khwine kha khalanwaha i ḓaho.
Vho khwaṱhisedza uri vho ṱangana na mudzulatshidulo Vho-Kaizer Motaung nga Ḽavhuṱanu ḽo fhiraho, hu na pulane dza u ḓisa vhatambi vhanzhi vha vhuimo ha nṱha.
“Mulovha ro vha na nyambedzano na vhalanguli na mudzulatshidulo, nahone ri a zwi ḓivha zwavhuḓi zwine zwa fanela u itwa malugana na vhatambi,” ho amba Nabi.
“A thi nga ambi uri ri khou toda vhatambi vhangana kana vha lushaka lufhio, fhedzi vha muhasho wa u thola vhatambi vha khou shuma nga maanda.”
“Muṅwe na muṅwe u a ḓivha ṱhoḓea dza thimu, nahone vhukwamani na vhane vha nga vha vhakhethiwa ho no thoma.
“Musi ri tshi wana zwine ra zwi toda, ri na vhutanzi uri thimu i do khwinisa zwinzhi.”
Vhabiki vho xelelwa nga qualification ya MTN8 lwa vhuvhili nga u tevhekana.
Vho fhedza vhe kha vhuimo ha vhutahe kha logi nga poindi dza 32 kha mitambo ya 28 .
Translated by Nthaduleni Rolivhuwa
