Vha Pirates vho vhea iṱo munwe mutambi wa Richards Bay
Orlando Pirates yo thola vhatambi vhavhili vha bvaho kha Richards Bay FC kha ino khalanwaha, nahone zwi vhonala u nga a vha athu fhedza u ṱhasela tshigwada tsha KwaZulu-Natal.
Tshisima tshi re tsini na tshigwada tsha Soweto tsho sumbedza uri vha khou ṱoḓa u vhuya vha ṱoḓa muṅwe wa vhatambi vhaswa vha Natal Rich Boyz.
Orlando pirates yo saina Nkosikhona Ndaba na Yanela Mbuthuma u bva Richards Bay.
Mbuthuma u khou sumbedza u vha mutambi wa phanḓa a vhulayaho ngauri o no kora zwikoro zwiṱanu kha mitambo ya fusumbe u swika zwino nga fhasi ha vhugudisi ha Abdeslam Ouaddou.
Naho vhanwe vhatikedzi vho vha vha tshi mu timatima musi a tshi ḓiswa kha thimu, o wina mbilu dzavho nga u tamba zwavhuḓi u swika zwino.
Ndaba na ene u khou thoma u vha mutambi wa tshifhinga tshoṱhe nga zwiṱuku nga zwiṱuku musi a tshi khou ṱoḓa u bvisa Deon Hotto we a lingedzwa na u fulufhedzea kha vhuimo ha left back.
O thoma mitambo mivhili yo fhelaho kha Pirates nahone o ita zwavhuḓi – a dzhia tshikoro musi a tshi tamba na Golden Arrows na u wana pfufho ya Munna wa Mutambo.
Nahone zwino tshisima tshiri Pirates ngoho yo vha i tshi khou toda vhatambi vhararu, fhedzi munwe o vha o huvhala mafheloni a khalanwaha yo fhelaho zwenezwo zwo shandula nḓila ye vhatambi vha khou tamba ngayo.
“Ngoho ro vha ri tshi khou sedza vhatambi vhararu khavho, ra fhedza ro dzhia vhavhili fhedzi,” ho amba tshisima.
“Thimu ya thekhinikhala ya khalanwaha yo fhiraho ngoho yo vha yo no thoma ya ṱalula we a vha a songo sainwa fhedzi a mbo ḓi wana vhulwadze.
“Fhedzi vha ḓo vha vha tshi kha ḓi mu sedzulusa musi o no fhola na u tamba hafhu u vhona arali zwa vhukuma e ene we vha thoma u mu vhona khae.
“Ndi nga si kone u ni ṋea dzina zwa zwino ngauri a thi ḓivhi uri nyambedzano dzi ngafhi nahone a thi nga ṱoḓi u fhufha murumba u sa thu lila.”
Mutambi uyu wa minwaha ya 24 u tamba kha right wing, nahone sa vhunga Orlando Pirates i tshi nga xelelwa nga vhanwe vha vhatambi vhayo kha khalanwaha i daho, a nga ḓiswa.
Lisenethini yo vhiga zwenezwino uri hu na zwigwada zwa nnḓa ha shango zwine zwa khou lavhelesa nga vhuronwane Relebohile Mofokeng na Oswin Appollis nahone zwi nga vha ṋea zwifhiwa hu si kale.
