U tuwa ha mutambi wa TS Galaxy nga R15 miḽioni
Mutambi wa TS Galaxy o saina thendelano ya miṅwaha miraru na Molde FK. Zwine zwa amba uri u ḓo vha e Norway u swika nga 2028.
Mutambi wa TS Galaxy Samukelo Kabini o khwaṱhisedza lwa tshiofisi u ṱuwa hawe kha Molde FK ya Norway nga tshelede ya R15 miḽioni.
Kabini o bviselwa khagala nga Molde FK nga Ḽavhuṋa nga murahu ha musi o ḓikumedzela kha thendelano ya miṅwaha miraru navho.
o ṱuwa Afrika Tshipembe ino vhege u itela u fhedza ngalafho yawe a sa athu u saina na Molde FK.
Musi lubuli ḽwa u fhirisela vhatambi ngei Norway ḽu tshi khou vala nga ḽa 27 Ṱhafamuhwe,
u ṱuwa ha Kabini ho vha ho dzula ho lavhelelwa u fhelela nga u ṱavhanya musi o no phasa ndingo dzawe dza zwa ngalafho.
Molde FK yo thoma khalanwaha yayo nga dzi 15 Ṱhafamuhwe musi i tshi kundwa nga Kristiansund nga 4-0 kha Ḽigi ya Khonferentsi ya Europa.
Zwino, u swika ha Kabini zwi amba uri u ḓo lavhelelwa u ḓisa vhudziki kha tsireledzo ya Molde FK i bvuḓaho.
Mutsireledzi wa minwaha ya 21 o vha e murado wa ndeme kha TS Galaxy kha ino khalanwaha kha u tsireledza na kha u ṱhasela.
Naho o vha e mutamba-murahu, Kabini o vha o no ḓi kora zwikoro zwiraru kha mitambo ya 19 ya ligi musi a sa athu ṱuwa.
“Ndo takala vhukuma u vha fhano Molde. Ho vha maḓuvha a si gathi a takadzaho, nahone ndo lavhelela u thoma,” ho amba Kabini.
“Ndo pfa zwithu zwinzhi zwavhuḓi nga ha kilabu nahone ndo vhona nḓila ine Molde ya tamba ngayo kha ḽa Norway na kha ḽa Yuropa.I vhonala i fhethu havhuḓi vhukuma ha u bveledza sa mutambi.
“Ndi funa u tamba nga vhuhali na u shumisa muvhili wanga kha mutambo. Ndo tamba sa mutsireledzi wa tsha monde na mutsireledzi wa vhukati, nahone ndi dzulela u ṋetshedza zwoṱhe kha thimu,” o pendela nga u ralo.
vhalani hafhu: Eben Etzebeth a nga tamba kha Tshiphuga tsha Ḽifhasi tsha 2027?
- Source: thesouthafrican.com
- Translator: Nthaduleni Rolivhuwa
