Gayton McKenzie u ri Pitso Mosimane a holelwe sa Hugo Broos

Minisiṱa wa Mitambo wa Afurika Tshipembe, Gayton McKenzie, o bvisa mbilaelo khulwane nga ndila ye SAFA ya khou lengedza ngayo u hanedzana na u vhuya ha Pitso Mosimane sa mugudisi wa Bafana Bafana.

Ene u vhona u nga nyimele iyi a i khou tshimbila nga u ṱavhanya, ngeno tshifhinga tsha u lugiselela mitambo tshi tshi khou sendela.

McKenzie o amba a ri: “Pitso u tea u badelwa zwe Hugo Broos a vha a tshi khou wana.”

U dovha a vhudzisa uri ndi ngani Mosimane a tshi tea u dzudzanya kana u lamukisa zwine a khou humbela musi SAFA yo no badela mugudisi muṅwe tshelede nnzhi kha mushumo wonoyo.

Nga maipfi awe, McKenzie o sumbedza ndeme ya Mosimane, a ri: “Pitso o no wina dzikhapu. O ḓiitela dzina, nahone ndi tshibveledzwa tshashu.”

Hezwi zwo ita uri vhathu vhanzhi vha dovhe vha lavhelese nga vhuronwane kha ndila ine muholo wa mugudisi wa lushaka wa tea u dzudzanywa ngayo.

Zwo bviselwa khagala uri Hugo Broos o vha a tshi hola R16.8 million nga ṅwaha, zwine zwa lingana na R1.4 million nga ṅwedzi, zwi sa kateli fhethu ha u dzula, vhuendi kana mutshimbidzi.

Nga thungo iṅwe, SAFA yo thoma nga u ṋea Mosimane R5 million nga ṅwaha, ya fhedzisela i tshi engedza ya ya kha R10 million.

Naho zwo ralo, u tholwa ha Mosimane hu kha ḓi lengiswa nga mafhungo a kontraka ane a sa athu tandululwa.

• VHALANI HAFHU : Zanele Potelwa u vhuya kha Tropika Island of Treasure 12

Hezwi zwi khou bvelela nga tshifhinga tshine Bafana Bafana ya khou lugiselela mtambo wa u dzhena kha AFCON ya 2027, zwine zwa ita uri tseo  dzi dzhiiwe nga u ṱavhanya.