Mohau o bvisela khagala uri o zwi wana hani uri u khou ṱutshela Bucs

Zwo bviselwa khagala uri Mohau Nkota o wana hani mafhungo a uri hu na thimu ine ya vha na dzangalelo khae nahone u khou ṱuwa kha Orlando Pirates.

Mutambi wa minwaha ya 20 o ṱutshela Pirates a dzhena kha Al-Ettifaq, ine ya tamba kha ligi ya nṱha ngei Saudi Arabia.

O bvisela khagala uri o wana hani mafhungo aya musi a tshi khou amba kha mbekanyamushumo ye ya bvisela khagala zwe zwa itea musi Pirates i Spain.

U SOLA

Orlando pirates yo vha i Spain i tshi khou lugisela khalanwaha ntswa musi Mohau Nkota a tshi pfa mafhungo a uri u khou ṱuwa.

“Ndo wana uri hu na mavharivhari kha nyanḓadzamafhungo ya matshilisano a uri tshigwada tsha Saudi Arabia – Al-Ettifaq – tshi khou nṱoḓa , ngauralo ndi khou ṱutshela tshigwada.

“Ndi tama u livhuwa vhoṱhe vhe vha vha vhe na nṋe u bva tshe nda dzhena kha Orlando Pirates,” ho amba Mohau Nkota.

“Ndi dovha nda livhuwa vhatikedzi kha zwoṱhe – kha thikhedzo yavho.Vho vha vha tshi dzulela u vhidzelela dzina ḽanga tshitediamu tsha Orlando.

“Ndi a zwi ḓivha uri tshiṅwe tshifhinga zwo vha zwi sa takadzi, tshiṅwe tshifhinga zwo vha zwi tshi takadza.Fhedzi zwoṱhe zwe zwa itea kha khalanwaha yo fhiraho, vho ntikedza.

‘TSHIPOROFITO’ KHA PIRATES

O mbo ḓi sumbedza lutamo lwawe lwa uri naho a siho, Pirates i ḓo swikela zwiphuga zwoṱhe zwa PSL kha ino khalanwaha.

“Ndi tamela mashudu vhatambi nga nṋe vha tshi wina ligi, MTN8, Tshiphuga tsha Nedbank na Tshiphuga tsha Carling – zwiphuga zwoṱhe.

• VHALANI HAFHU: Asanele Velebayi o vula nga ha nndwa ya Spurs na Chiefs

Lutamo lwa Nkota lu vhonala lu tshi nga ndi tshiporofito sa izwi Pirates yo no wina zwiphuga zwivhili – MTN8 na Carling Knockout.