Maḓuvha a mukapuṱeni wa kale wa Chiefs ngei Naturena o sekena
U pfulutshela ha Msimango kha Kaizer Chiefs zwo dzhiiwa sa u bvelela nga murahu ha khalanwaha yawe ya u thoma murahu nga 2023.
Nga fhasi ha mugudisi Vho Cavin Johnson, mutsireledzi wa kale wa TS Galaxy o vhewa sa mukapuṱeni nahone a ita na u vhidzwa kha thimu ya lushaka ya Bafana Bafana.
Naho zwo ralo, khalanwaha yawe ya vhuvhili yo thithiswa nga ṅwambo wa u huvhala, zwa ita uri a kone u tamba mitambo ya 11 fhedzi.
Nga u swika ha mugudisi muswa na u saina ha Miguel Inacio na Rushwin Dortley, Msimango o wela kha vhane a vha tambesi.
Nga tshifhinga tsha pre-season, mukapuṱeni wa kale wa Kaizer Chiefs o sumbedza u fhisetshela hawe u vhuisa vhuimo hawe kha thimu ya u thoma.
Naho zwo ralo, ho no fhela miṅwedzi miṋa kha khalanwaha, ha athu u bvelela na luthihi.
“Zwi pfala zwi zwavhuḓi u vhuya. Ndo fhira kha vhulwadze vhu ofhisaho vhukuma, fhedzi a si tshithu tshine nda kha ḓi ṱangana natsho,” Msimango o vhudza tshigwada tsha nyanḓadzamafhungo tsha Amakhosi.
- vhari wana kha facebook| Mitamboyashu.co.za
“Zwo nnyita uri ndi si kone u tamba lwa miṅwedzi mivhili, fhedzi zwino ndo vhuya, ndi khou gudiswa zwavhuḓi, ndi khou fhola, nahone ndo dovha nda vha na maanḓa.”
O engedza nga uri, “Hedzi tsedzuluso dza zwa mishonga ndi dza ndeme vhukuma ngauri dzi shuma sa tshilinganyo tsha khalanwaha i ḓaho. Dzi ni thusa u vhona hune na ima hone, khathihi na maanḓa na vhushayanungo haṋu.”
Zwa zwino, Kaizer Chiefs yo dzudzanya u tambisa vhatambi vha vhukati vha murahu vhane vha vha Aden McCarthy na Miguel, vhane Zitha Kwinika na Dortley vha ḓo vha vhatambi vha murahu.
Tshikhala tsha Msimango tsha u dzhena kha thimu ya u thoma tshi vhonala tshi tshiṱuku, nahone a nga humbula u ṱoḓa tshifhinga tsha mutambo huṅwe fhethu.
Mugudisi wa Kaizer Chiefs Khalil Ben Youssef o sumbedza uri mutsireledzi o vhuyelela kha vhuimo hawe ho fhelelaho.
- VHALANI HAFHU: Mutambo Pirates na Chippa United wo fhiriselwa phanda
Nga minwaha ya 28, maduvha a Msimango kha Chiefs o vhaliwa nahone a nga ṱuwa mafheloni a khalanwaha arali a kundelwa u bvelela.
