Moremi o fulufhedzisa zwinzhi nga murahu ha gundo ḽa MTN8
Moremi o fulufhedzisa zwinzhi nga murahu ha gundo ḽa MTN8
Tshepang Moremi vhari gundo lavho kha MTN8 na Orlando Pirates ndi mathomo fhedzi.
Mutambi uyu wa minwaha ya 24 o dzhena kha Pirates a tshi bva kha AmaZulu FC mathomoni a khalanwaha ino.
O bva kha bench a dzhia zwikoro zwivhili zwi mangadzaho nga tshifhinga tsho engedzwaho musi Pirates i tshi kunda Stellenbosch nga 3-0 ya wina tshiphuga tshayo tsha vhuṋa nga u tevhekana tsha MTN8.
Tshegofatso Mabasa o dzhia tshiṅwe tshikoro, nahone Moremi na ene o vha o dzhenelela kha tshenetsho.
Vhuvhili havho vho dzhena nga miniti ya vhu 74 ya mutambo tshitediamu tsha Mbombela nga Mugivhela wo fhiraho.
“Ndi kale ndi tshi ṱoḓa u wina MTN8 ngauri a thi athu vhuya nda wina tshiphuga, ngauralo hezwi zwi amba zwinzhi kha nṋe,” ho amba Moremi.
“Ndi ḓo wina dziṅwe khaphu nnzhi nga murahu ha hezwi — hezwi ndi mathomo fhedzi.”
Tshepang Moremi o bvisela khagala uri mugudisi wa Orlando pirates Abdeslam Ouaddou o mu vhudza uri u do kora tshikoro musi a sa athu u dzheniswa kha mutambo.
O amba uri o shumisa tshikhala tshi re murahu ha Stellies’ backline, sa zwe mugudisi a mu laedza zwone.
Tshepang Moremi o vha muhali nga murahu ha u vhidzelelwa nga tshipiḓa tsha vhatikedzi vha Orlando Pirates.
Moremi u do vha a tshi khou fulufhela u isa phanda na u kora zwikoro kha Caf Champions League musi Pirates i tshi thoma fulo layo mafheloni a vhege.
Pirates i ḓo dalela kilabu ya Lioli ya Lesotho stadium tsha Free State ngei Bloemfontein nga Mugivhela, mutambo u ḓo thoma nga awara ya vhuraru nga masiari.
Mutambo wavho wa Betway Premiership na Magesi FC we wa vha wo vhetshelwa u tamba nga Lavhuraru wo fhiriselwa phanda musi vha tshi khou lugisela mutambo wavho wa Champions League.
- Vhalani hafhu : Mukapuṱeni wa Chiefs o dzhena kha thimu ntswa ya ino khalaṅwaha
Mutambo uyu u khou tambelwa shangoni ngauri Lesotho a ḽi na zwitediamu zwo tendelwaho nga Caf zwine zwa nga fara mitambo yaḽo.
Translated by Nthaduleni Rolivhuwa
