Hlungwani o amba nga u xelelwa nga phena ha All Stars
Malugwanewa kale wa PSL Vho-Victor Hlungwani vho amba nga ha zwiwo zwivhili zwe zwa vhanga khanedzano kha mutambo wa Carling Cup wa mafheloni a vhege o fhiraho.
Orlando pirates yo kunda carling all stars nga 2-0 stadium tsha moses mabhida nga mugivhela u itela u vha ngwenya dza khaphu.
Fhedzi zwe zwa sia zwi tshi vhavha milomoni ya vhatikedzi vha dziṅwe thimu ndi zwiwo zwivhili zwine vha tenda uri zwo vha zwo fanela u ita uri All Stars i ṋewe phena.
Kha tshiwo tsha u thoma, mutambi wa Kaizer Chiefs Mfundo Vilakazi o wela nga ngomu ha bogisi nga murahu ha u drivhula kha Makhehleni Makhaula.
“Ri ḓo zwi vhona ngei Durban… Kha mutambo wa Orlando Pirates na Carling All Stars.
“Kha ri vhone uri Vila o raha kana hai, arali na sedza zwavhuḓi ni ḓo vhona uri malugwane u khou mu ṋea khadi ya muvhala wa Ṱaḓa nga ṅwambo wa zwezwo.
“Fhedzi kha ri vhone uri ho vha na vhuyada naa.. Ni nga zwi vhona uri Makhaula o raha bola.
“Arali wa raha bola, a hu na vhuyada he ha itwa.U nga zwi vhona uri Makhaula o raha bola – o tamba bola.
“Ngauralo ahuna vhuyada nahone ho vha hu tsheo yo teaho ya malugwane ya u sa ṋea Phena,” ho amba Hlungwani.
Kha tshiwo tsha vhuvhili, mutsireledzi wa Pirates Olisa Ndah o raha Naledi Hlongwane, zwa mu hanela tshikhala tsha u tamba bola nga ngomu ha bogisi.
“Kha i tevhelaho… ri vhona Naledi Hlongwane a tshi khou ṱanganedzwa nga Olisa Ndah.
“Arali na sedza zwavhuḓi o dirivhula Naledi nga ngomu ha bogisi,”
“U dirivhula hu tea uvha na mutsindo, zwine zwa amba uri hu tea u thivhela muthu uri a si tambe bola kana u sika tshikhala tsha u dzhia zwikoro.
“Zwino hafha Naledi o vha o thivhelwa ho vha hu tshi fanela u ṋewa phena.
“Fhedzi a zwo ngo itea nga u ralo, heyo yo vha i tsheo mmbi nga malugwane.”
