Baartman o amba nga ha mutambo wawe wa u thoma kha Chiefs
Luke Baartman o bvisela khagala mihumbulo yawe nga ha mutambo wawe wa u thoma kha Kaizer Chiefs – we a u ṱalusa sa muloro wo bvelelaho.
O dzhena ho bvisiwa munwe mutambi kha mutambo wavho na TS Galaxy kha mutambo wavho wa u fhedzisela wa khalanwaha zwenezwino.
Mutambi uyu wa minwaha ya 19 o dzhena kha Chiefs nga mahala nga murahu ha musi o ṱuwa kha Cape Town Spurs mathomoni a khalanwaha.
O tamba lwa u thoma musi a tshi dzhena ho bvisiwa George Matlou nga miniti ya vhu 80 ya mutambo tshitediamu tsha Mbombela, Nelspruit.
“Zwo pfala zwi zwavhuḓi u vhuyelela mudavhini nahone zwo vha zwi tshifhinga tsha u ḓihudza kha nṋe u kokodza jesi ya Kaizer Chiefs,” ho amba Luke Baartman.
“Nga murahu ha u gudiswa nga maanḓa miṅwedzini i si gathi yo fhiraho, zwo vha zwi tshi mangadza u fheleledza ndo tamba kha kilabu khulwane nga u rali.”
Luke Baartman o vha a sa koni u tamba kha Kaizer Chiefs nga u ṱavhanya nga murahu ha musi o no saina nga ṅwambo wa nndwa ya mulayo na Spurs vha tshi khou lingedza u thivhela u saina hawe.
Ndi ngazwo o wana zwi tshi konḓa kha u tamba hawe ha u thoma, fhedzi o sumbedza zwiga zwa u vha mutambi wavhuḓi vhukuma.
“Naho zwo vha zwi songo leluwa, sa izwi ndi sa athu tamba lwa tshifhinganyana, ndi pfa ndo shela mulenzhe kha u ṱhasela musi ri tshi khou lingedza u thutha luvhondo lwa Galaxy,” o engedza nga u ralo.
Baartman u do vha a tshi khou fulufhela u wana tshifhinga tshinzhi tsha mutambo musi Amakhosi i tshi vhuya mudavhini nga murahu ha tshifhinga tsha u awela tsha Afcon.
Vha do thoma nga mutambo na Golden Arrows nga dzi 20 dza Phando.Mutambi muswa wa Chiefs o rumela mulaedza kha vhatikedzi vha thimu.
“Ndi tamela vhafuni vhashu holodei yavhuḓi na Khirisimusi yavhuḓi,” ho amba Baartman.
“Ro lavhelela u vha vhona hafhu nga vhunzhi nga murahu ha tshifhinga tsha u awela musi ri tshi dovha ra thoma mafulo ashu a ligi na a Confederation Cup.”
