Pirates na maswamaswa nga ha Ncikazi we a vha e ḽivini

Orlando pirates yo ita nḓivhadzo i mangadzaho nga ha tshanḓa tsha mugudisi Vho-Mandla Ncikazi.

Vha tshigwada tsha Soweto vho bvisela khagala uri mugudisi u khou ṱuwa kha tshigwada nga u ṱavhanya.

Ri amba uri vha do dzhia vhuimo ha u vha mugudisi muhulwane wa inwe ya thimu dza Premier Soccer League (PSL).

Nḓivhadzo iyi yo ḓa nga murahu ha awara dzi si gathi musi mugudisi wa Pirates Abdeslam Ouaddou o hanedza mivhigo ya uri o vha na u sa anḓana na Ncikazi.

Uya nga ha tshitatamennde tsha Pirates, tsheo iyi yo tevhela nyambedzano vhukati ha Ncikazi na vhalanguli vha kilabu nga matsheloni a Lavhuṋa

Ndi hone he Ncikazi a sumbedza lutamo lwawe lwa u wana tshikhala tsha u dovha hafhu u gudisa thimu sa mugudisi muhulwane.

Vha Pirates vho mufha phathutshedzo dza u tevhela tshikhala hetshi tshiswa.

Mandla Ncikazi o ṱutshela Orlando Pirates nga murahu ha u wina zwiphuga zwa sumbe sa muraḓo wa tshigwada tsha vhagudisi.

Vho shuma nga maanḓa sa mufarisa fhasi ha vhagudisi vho fhambanaho, nahone vho dovha vha vha mudededzi na Fadlu Davids lwa tshifhinganyana.

Pirates vhari munna o i shumela nga u ḓikumedzela na tshirunzi nga tshifhinga tshawe kha kilabu.

Mudzulatshidulo wa Pirates Vho-Irvin Khoza vho hulisa Vho-Ncikazi kha u shela mulenzhe havho kha tshigwada, vhari vha a pfesesa lutamo lwavho lwa u dovha vha vha mugudisi muhulwane.

• VHALANI ZWINWE :Moshe Ndiki o ḓivhadza Mushumo muswa wa u hasha kha  TV 

Tshitatamennde tshi bvaho kha Pirates a tsho ngo bula dzina ḽa kilabu ya Vho-Mandla Ncikazi.

Fhedzi ho vhigwa mathomoni a vhege uri a nga vhuyelela Durban u dzhena kha Golden Arrows ine ya khou tambula kha ino khalanwaha.