Helman Mkhalele o sinyuswa nga tsheo ya zwenezwino ya FIFA

Muthusa mugudisi wa tshigwada tsha Bafana Bafana Vho-Helman Mkhalele vho sumbedza u sa takalela tsheo ya zwenezwino ya FIFA.

Tshiimiswa tshi langaho bola ya milenzhe kha ḽifhasi tsho dzhia tsheo ya uri thimu dzi nga vhulunga vhatambi u swika kha maḓuvha a rathi hu sa athu thoma Afcon.

Tsheo iyi ndi tshanduko khulwane kha mbekanyamaitele ya kale ye ya vha i tshi ṱoḓa uri vhatambi vha vhofhololwe maḓuvha a 14 phanḓa ha thonamennde khulwane dza dzitshaka.

Afcon ya uno nwaha i do farelwa Morocco ubva nga dzi 21 dza Nyendavhusiku u swika dzi 18 dza Phando, nahone Vho-Helman Mkhalele vha tenda uri tsheo iyi i do vha na masiandoitwa a si avhudi kha ndugiselo.

“Ndi nga amba uri hezwi a zwi pfali tshoṱhe nahone a zwi ṱanganedzei,” Mkhalele, ane a vha mufarisi wa Hugo Broos, o vhudza SABC Sport.

“U tshi sedza hezwi, u thoma u humbula uri khamusi Fifa a i ṱhonifhi bola ya milenzhe ya Afrika na luthihi musi i tshi vhambedzwa na bola ya milenzhe ya Yuropa.

“U thoma u ḓipfa u si wa ndeme musi u tshi vhambedzwa na dziṅwe ligi u mona na shango.”

Vho-Helman Mkhalele vho isa phanḓa na uri Khonifederesheni ya Bola ya Milenzhe ya Afrika (Caf) i tea u dzhia vhukando na u amba nga ha fhungo iḽi na Fifa.

“Caf i tea u thoma u amba yeneyo mbuno kha Fifa, nga maanḓa ngauri Afcon tshiṅwe tshifhinga i tamba nga nwedzi Nyendavhusiku kana Phando…

“Hezwi zwi khou itea ngauri hu kha ḓi vha na thimu dzine dza tea u tamba World Cup nga murahu ha zwenezwo,” Mkhalele o ṱalutshedza.

Samusi thimu nnzhi dza lushaka dzo dzudzanywa u tamba mitambo ya vhukonani u thoma nga ḽa 12 Nyendavhusiku, u bviswa ha vhatambi nga murahu ha tshifhinga zwi nga thithisa dzenedzo pulane.

“Musi u tshi humbula uri Caf i khou dzudzanya u tamba na Afcon musi hu sa athu thoma World Cup, kha ḽiṅwe sia zwi a thusa.

“Fhedzi kha ḽiṅwe sia zwi vhea mutsiko muhulwane kha thimu dza Afrika.

• VHALANI HAFHU:Chiefs yo amba nga ha pulane dzavho dza u fhirisela vhatambi

Mashudu mavhuya kha Bafana Bafana, vhunzhi ha vhatambi vhavho vha tamba hayani, zwine zwa amba uri tsheo a i nga ḓo vha na masiandoitwa mahulwane kha ndugiselo dzavho.