Gavin Hunt o amba nga u bva ha Teko kha SuperSport United
Lwa miṅwaha minzhi, ho vha hu tshi tendiwa uri mugudisi wa kale wa SuperSport United Gavin Hunt na mutambi wa vhukati Teko Modise vho vha vhe na vhushaka vhu si havhuḓi.
Vhanzhi vho amba uri ndi tshone tsho itaho uri Modise a ṱutshele tshigwada.
Fhedzi Hunt zwino o landula mafhungo eneo, a ri o vha o tshuwa musi Modise a tshi rengiselwa Orlando Pirates nga 2007.
Musi vha tshi khou amba kha mbekanyamushumo ya Apex Sports International,
Vho-Hunt vho bvisela khagala uri a vha na ndivho ya u litsha Vho-Modise vha tshi ṱuwa.
Zwi re zwone ndi uri o vha a tshi khou fhaṱa tshigwada tshawe u mona na munna we a vha a tshi ḓivhiwa nga vhathu vhanzhi sa “Mudzhenerala.”
“Ndi dzula kha nyanḓadzamafhungo nda thetshelesa Teko a tshi amba – nahone u amba muhwalo wa zwithu zwi si na mushumo,” ho amba Hunt.
“Ndi nga ṱoḓa mutambi wa khwinesa wa Afrika Tshipembe a tshi ṱuwa? Ni khou swaswa?”
Hunt o humbula lwendo lwawe lwa phanḓa ha khalanwaha ngei Australia nga murahunyana ha musi o no dzhena kha tshigwada.
Modise o vha a tshi bvelela kha mitambo, a ita na u wina pfufho dza Man of the Match.
Hunt o vha a tshi tenda uri mutambi wa vhukati a re na vhukoni u ḓo vha tshipiḓa tsha ndeme tsha tshifhinga tshiswa tsha SuperSport.
Naho zwo ralo, ho sala vhege nthihi fhedzi uri khalanwaha i thome, Hunt o mbo ḓi founelwa nga mudzulatshidulo nga nḓila i mangadzaho.
Hunt o humbula a ri: “O ri ri fanela u rengisa Teko. “Ndo ri, ‘Ni khou amba nga ha mini? Ndi mutambi wanga wa khwine!’
Fhedzi Pirates yo vha yo vhea mutsiko kha tshigwada, nahone thendelano yo no fhela.”
Hunt o hanedza nga maanḓa mafhungo a uri o sukumedzela Modise nnḓa ngauri o vha a sa tendelani na tshitaila tshawe tsha u tamba.
Ndo mu sukumedza nga maanda, khamusi ro vha ri tshi lwa kha training, fhedzi hezwo ndi tshipida tsha bola ya milenzhe. A zwi ambi uri ndo vha ndi sa mufuni.”
Translated by Nthaduleni Rolivhuwa
