Baloyi o bvukulula zwine Chiefs ya khaḓi shaya zwone
Mutambi wa kale wa thimu ya Kaizer Chiefs Vho-Brian Baloyi vhari thimu iyi yo khwatha lune ya nga kona u wina kha mitambo ya Betway Premiership fhedzi vho bvisela khagala tshithu tshithihi tshine tsha khou ṱahela.
U tenda uri vhagudisi vha zwino, Khalil Ben Youssef na Cedric Kaze ndi vhone vhe vha vha thaidzo ine ya nga thivhela thimu u ṱaṱisana kha dzi playoffs.
Vho Brian Baloyi vha na muhumbulo wa uri mugudisi are na tshenzhemo nahone o khwaṱhaho muhumbulo u fana na Pitso Mosimane kana Benni McCarthy a nga wina ligi na thimu ya zwino ya Kaizer Chiefs.
Musi vha tshi amba na Lisenethini , Vho-Baloyi vhari zwino thimu i khou toda mugudisi a re na tshenzhemo ane a ḓo kona u ṱanganya vhatambi.
Vho amba uri mugudisi o khwaṱhaho a nga ḓovha a ṱuṱuwedza vhatambi, a ita uri vha lwele mvelelo dzavhuḓi kha mutambo muṅwe na muṅwe.
“Mugudisi u tea u sukumedzela vhatambi naho vhe nnḓa ha mudavhi nahone a ṱoḓa uri vha lwe u itela u kunda mutambo muṅwe na muṅwe,” ho amba Baloyi.
“Zwi a konḓa kha vhagudisi vha zwino ngauri vha kha ḓi ṱoḓa lushaka lwa mugudisi ane vha vha ene uri vha kone u wina ligi.”
Vho Baloyi vho sumbedzisa vhatambi vha ndeme vhane vha toḓa vhalanguli vho khwathaho vhane vha ḓo vha alusa zwavhudi uri vha kone u vha phuphu dza thimu.
Vhatambi avha vha katela Luke Baartman, Asanele Velibayi, Lebohang Maboe, Mfundo Vilakazi na Mduduzi Tshabalala o bula vha si gathi.
U amba uri vhatambi vha ngaho Paseka Mako, Brandon Petersen, Zitha Kwinika, Ox Mthethwa, Thabo Cele na George Matlou na vhone vha tea u wana vhugudisi ho teaho.
- VHALANI HAFHU : Ouaddou o ṱalutshedza u sa tamba ha Tshegofatso Mabasa
Vho-Brian Baloyi vha khou kombetshedza uri nga vhurangaphanda ho teaho kha bentshi, Kaizer Chiefs i nga fhedza yo fhelisa gomelelo ḽayo ḽa ligi na u vhuedzedza u ḓikukumusa kha vhatikedzi vhayo.
