Tso o ṱalutshedza zwine a zwi takalela nga Ighodaro kha Chiefs

Mutambi wa kale wa thimu ya Orlando Pirates Vho-Benedict “Tso” Vilakazi vho khoḓa mutambi wa phanḓa wa thimu ya Kaizer Chiefs Vho-Etiosa Ighodaro nga murahu ha u tamba havho kha khaphu ya Caf Confederation.

Ighodaro o kora tshikoro tshawe tsha u thoma  musi Kaizer chiefs i tshi kunda AS Simba nga 3-1 stadium tsha Dobsonville nga Swondaha.

Gundo ḽo ita uri Kings i ḓiṅwalise vhuimo kha vhuimo ha zwigwada kha thonamennde ya vhuvhili khulwanesa kha bola ya milenzhe ya dzikiḽaba kha dzhango.

Tso uri mutambi wa Nigeria u muhumbudza Lazarus Kambole, a engedza nga uri u vha hone hawe zwi nga vha zwa ndeme kha Chiefs kha ino khalanwaha.

“Hoyu mutambi wa phanḓa u nkhumbudza mutambi ane nda mu funa, Kambole,” Vilakazi o vhudza iDiski TV. 

“Hu na vhaṅwe vhatambi vhane na vha ṱoḓa kha thimu hu sa londwi uri vha khou tamba kana hai – mvelelo dzavho dzi hone.

“Ighodaro ndi mutambi wa ndeme vhukuma kha Kaizer Chiefs. Sedzani fhedzi zwikoro hezwi — ndi lini he na fhedzisela u vhona Chiefs i tshi kora zwikoro zwinzhi nga u rali?”

Vho-Vilakazi vhari mutambi wa minwaha ya 24 u do isa phanda na u konḓisa vhutshilo ha vhatsireledzi vha Betway Premiership.

“Hoyu munna u kha ḓi ḓo fhedza thimu — vhathu vha kha ḓi ḓo mu lila,” Tso o engedza.

“U a ḓivha, arali wa ṋea vhatambi tshikhala zwi na masiandoitwa mavhili: mutambi uyo u takusa thimu kana u i ḓisa fhasi. Ighodaro o i takusa.”

• VHALANI HAFHU : Sifiso Myeni u ri Ouaddou u ḓo vha strong

Ighodaro u khou lavhelelwa u ranga phanḓa kha u ṱhasela ha Kaizer Chiefs hafhu musi vha tshi tamba na Durban City stadium tsha Moses Mabhida nga Ḽavhuṱanu.

Thimu dzi do tangana kha mutambo wa Betway Premiership wo lavhelelwaho vhukuma nga hafu ubva kha awara ya sumbe nga madekwana.