Makalakalane u tshe o kwatela jomo sono na zwino

Mutambi wa kale wa Bafana Bafana Augustine ‘Witch’ Makalakalane o bvisela khagala  khanedzano na muḓivhalea wa bola ya milenzhe a ṱhonifheaho wa Afrika Tshipembe Jomo Sono.

Vhuvhili havho vho shuma vhoṱhe kha Jomo Cosmos. Jomo Sono o vha e mugudisi na mulanguli wa Augustine Makalakalane kha Cosmos mafheloni a vho 1980s.

Kha nyambedzano na Radio 2000 ino vhege, Vho-Makalalane vho bvisela khagala uri vho ṱutshela Cosmos ngauri vhatambi a vha badelwi, zwe zwa ita uri vha ṱoḓe zwikhala nnḓa ha shango.

Nga 1990, vho dzhena kha FC Zürich ngei Switzerland, nga murahu vha pfulutshela kha FC Baden vha sa athu vhuyelela Zürich.

Uya nga ha Ausgustine Makalakalane, Jomo Sono o mbo ḓi ṱoḓa tshelede ye a i saina musi a tshi pfulutshela Europe — khumbelo ye a i hana.

“Nṋe muṋe ndo tou wana mushumo kha FC Zürich, ngauralo ho vha hu si na tshithu tshine tsha nga nṱumanya na Sin henefho,” ho amba mukalaha wa miṅwaha ya 62.

“zworalo, a ri ambi rothe. Na musi ri tshi tangana kha lift nthihi, ahuna muthu ane a nga amba na munwe.

“Ndo mbo ḓi mu vala mulomoni musi ndi tshi hana u mu ṋea tshelede ye nda saina.”

Makalakalane o dovha a pomoka Vho-Sono uri vho thivhela mufu Vho-Thomas ‘Change’ Vho-Madigage uri vha si ṱoḓiwe mashangoni a nnḓa.

O amba uri mulanguli wa Cosmos o vha a tshi ṱoḓa mbadelo dzo kalulaho kha kilabu dza Yuropa dzine dza vha na dzangalelo ḽa u mu renga.

“Madigage o vha a tshi khou ṱoḓiwa nga tshigwada tsha Manchester United, Manchester City, na Tshigwada tsha Lisbon nga tshenetsho tshifhinga.

“Fhedzi ṱhoḓea dza Sono dzo vha dzi nnṱha vhukuma, zwigwada zwo shavha,” Makalakalane o ralo.

Nga murahu ha u dzula lwa tshifhinga tshilapfu ngei Switzerland, Makalakalane o vhuya hayani nga 1997 a dzhena kha tshigwada tsha Mamelodi Sundowns.

Vho thusa thimu u wina zwiphuga zwiraru zwi tshi khou tevhekana zwa ligi nga fhasi ha mugudisi o lovhaho Ted Dumitru.

Nga murahu vho mbo ḓi tamba kha Wits University vha sa athu u fara khokho, vha konaha u fhira kha zwa vhugudisi.

Sa mugudisi vho shuma kha Black Leopards nga murahu vha vha mugudisi wa tshifhinganyana kha tshigwada tsha Banyana Banyana.

Vho-Makalakalane vha dzhiiwa sa munwe wa vhathomi vha bola ya milenzhe ya Afrika Tshipembe ya nga murahu ha muvhuso wa tshiṱalula, nahone vho vha vhe tshipiḓa tsha thimu ya u thoma ya Bafana Bafana nga 1990.

• VHALANI HAFHU : U bva ha Pirates kha Champs League zwo vhaisa Bafana

Nga murahu vho thusa Afrika Tshipembe u takula khaphu ya tshaka ya Caf Afrika nga 1996 nga fhasi ha mufu Clive Barker.