Lance Davids u vhilahela nga vhatambi vha PSL vhare mashango a nnḓa 

Mutambi wa kale wa Bafana Bafana Lance Davids o bvisela khagala zwine a tenda uri ndi tshinwe tsha zwiitisi zwine zwa ita uri kilabu dza mashango a nnḓa dzi sa ṱoḓe u tamba vhatambi vha Premier Soccer League (PSL).

Mutambi wa kale we a shanduka a vha mulanguli Vho-Lance Davids vhari mbadelo dzine kilabu dza PSL dza badelisa vhatambi vhadzo dzi khou pandela kilabu dza Europe.

Mulanguli wa dzitshaka wa Belgium vhari vhunzhi ha dzi kilabu dza mashango a nnḓa dzi na dzangalelo kha vhatambi vha Afrika Tshipembe.

Vha ri dzangalelo ḽi ḓo hula nga murahu ha mitambo ya Africa Cup of Nations nga Khubvumedzi na World Cup ya ṅwaha u ḓaho.

Fhedzi vho tsivhudza uri kilabu dza Afrika Tshipembe a dzi faneli u vhea masheleni phanḓa musi zwi tshi ḓa kha vhatambi vhadzo.

“Ndi vhona u nga makete wa Afrika Tshipembe wo sedzwa vhukuma nga tshifhinga tshino nga ṅwambo wa zwe zwa itea Ivory Coast (kha Afcon yo fhiraho).

“Thimu dzashu dza lushaka dza vhaṱuku na dzone dzi khou tshimbila zwavhuḓi vhukuma,” Lance Davids o vhudza SABC Sport.

“Thaidzo ndi ya uri dzi club dzashu dzi a dura vhukuma. Thimu ya Europe a i nga badeli tshelede nnzhi kha mutambi wa Africa ane a kha di vha Africa — vha funa u ita hezwo kha muthu ane a vha uri o no vha Europe.”

Vho-Lance Davids vho eletshedza dzi kilabu dza PSL uri dzi humbule nga ha mbuelo dza tshifhinga tshilapfu nṱhani ha u sedza kha mbuelo fhedzi zwino.

• VHALANI HAFHU :Carling Knockout iya KZN

“Thimu dzi fanela u sedza kha u vhulunga masheleni musi mutambi a tshi rengiswa hafhu,” vho engedza nga u ralo.

“Fhedzi heyi ndi nyeletshedzo yanga fhedzi. Ligi yashu ndi ya vhuimo ha nṱha nahone yo dzudzanywa zwavhuḓi — ndi iṅwe ya khwine kha dzhango.”