Schalkwyk o bvisela khagala muholo we wa musiisa Chiefs a tshi ya kha Bucs
Mutambi wa kale wa thimu ya kaizer chiefs Gert Schalkwyk o talutshedza uri Bobby Motaung o mu vhea hani mutsiko nga murahu ha musi o pfa uri o saina kha thimu ya orlando pirates.
Gert Schalkwyk o vha e muṅwe wa vhatambi vha nṱha vha Chiefs musi a tshi kungwa nga Pirates ye ya engedza muholo wawe kavhili.
O amba uri o vha a tshi khou hola R35 000 kha Chiefs, Pirates yo mu ṋea R70 000 fhedzi hezwi zwo itea musi thendelano yawe kha Naturena i sa athu fhela.
O bvisela khagala zwe zwa itea musi a tshi ṱutshela Chiefs a tshi ya kha tshigwada tsha Pirates musi a tshi khou amba kha podcast ya Josta ine ya pfi Play Dogs of the Game.
“Musi ndo no saina thendelano na Pirates , nga ḓuvha ḽi tevhelaho ndo vha ndi gym nahone Bobby a mmbidza uri ndi dzhene ofisini,” Schalkwyk o ralo.
“Ndo ri ndi tshi dzhena a ri, ‘muṱhannga wanga, zwino ro zwi humbula – ri a zwi ḓivha uri inwi na mugudisi ni na zwithu zwaṋu – fhedzi u khou tamba zwino.
“‘Ri ḓo engedza thendelano yaṋu nga miṅwaha miraru’ Nga tshenetsho tshifhinga ndo vha ndo no saina thendelano ya u fulufhedzisa na Pirates.
“Ndo vha ndo vhudzwa uri ndi songo vhudza muthu uri ndo i saina.O isa phanḓa, ‘heyi ndi thendelano, ri ḓo founela Mike (Makaab, mulanguli wawe).
“‘Ri do vhea founu kha tshipikara uri a kone u pfa na u tendelana na zwothe zwine ra amba’.Hafho ndo vha ndi tshi kho u timatima, ndi tshi kho u di vhudzisa uri hu kho itea mini zwino.
“Ndo mu vhudza nda ri, ‘Bobby, nṋeeni muholo u ṱoḓaho u vha R60 000,’.” Vha Pirates vho vha vha tshi khou nṋea R70,000 nga tshenetsho tshifhinga, nahone ndo vha ndi tshi khou hola R35,000 kha Chiefs.
“Ni a ḓivha zwe Bobby a amba? A ri, ‘Hai, R60,000 ndi ṱhukhu vhukuma, mutukana wanga, kha ndi sokou ni ṋea R80,000’.”
Gert Schalkwyk, a tshi zwi vhona uri o ḓaḓa, a humbela tshifhinga tsha u amba na khotsi awe uri a ṱoḓe nyeletshedzo yavho musi a sa athu saina.
- VHALANI HAFHU : Benson Mhlongo u ri u ṱoḓa u dzula fhasi a amba na Tito
“A mbo ḓi ri, ‘Zwo luga, u ḓo saina kha Chiefs fhedzi ri ḓo u hadzima kha Bloemfontein Celtic.
“A mbo ḓi ri, “muṱhannga wanga, kha ri ambe ngoho, naa no no saina na Pirates?’ O vha a tshi zwi ḓivha zwavhuḓi,” Schalkwyk o bvela phanḓa a tshi khou sea.
