Benson Mhlongo u ri u ṱoḓa u dzula fhasi a amba na Tito

Mutsireledzi wa kale wa tshigwada tsha Orlando pirates Benson Mhlongo o ḓikumedzela u thusa ṋaledzi ya tshigwada itsho Patrick “Tito” Maswanganyi u gonya nṱha.

Benson Mhlongo u tenda uri Tito ndi mutambi wa ntha fhedzi zwe Jomo Sono a amba zwo mu thithisa, zwa ita uri a timatime.

Kha khalaṅwaha yo fhiraho, Sono o vhudziswa nga ha Tito musi a tshi dzhia jesi ya nomboro ya vhufumi kha Pirates kha fulo ḽa Caf Champions League.

Kha phindulo yawe o sumbedza uri Maswanganyi ha ngo vhuya a vha tsini na vhuimo hawe, a ri u vha vhambedza zwi fana na u vhambedza nḓou na ṋowa.

Musi vha tshi khou amba na Omni Sports zwenezwino, Vho-Benson Mhlongo vho vhambedza Maswanganyi na vhahali vha kale vha funiwaho nga vhathu Teko Modise na Jabu Mahlangu.

“Tito u nkhumbudza vhatambi vha ngaho Teko Modise, Jabu Pule… Ni a zwi ḓivha uri lushaka ulu lwa vhukoni a lu pfeseswi zwavhuḓi,” ho amba Mhlongo.

“Ndi ngauri vha vhona zwithu zwine ra sa zwi vhone, vha ita zwithu zwine ra sa zwi pfesese – ndi nga ndila ine vha vha ngayo fhedzi.

“zwino vha wana mutsiko munzhi . Musi vhathu vha tshi vhona uri u na vhukoni ho khetheaho, ndi hone vha tshi vhea mutsiko muhulwane ngauri vha tenda kha iwe.

“Tito ndi munwe wa avho. U na vhukoni. Ndi vhona unga mafhungo a No. 10 o ita uri a timatime nyana.

“Ndi vhona unga tshinwe tshifhinga ndi fanela u mu wana, nda dzula nae fhasi, nda pfesesa uri u humbula hani – hune a vha hone muhumbuloni.

• VHALANI HAFHU : Ouaddou o talutshedza uri ndi ngani vho kundwa nga Lupopo

“Ndi hone ndi tshi ḓo muita uri a pfesese zwine vhatikedzi vha ṱoḓa khae na uri ndi ngani vha tshi tenda khae nga u rali.”