Quinton Fortune u na ngeletshedzo  kha Hugo Broos

Mutambi wa kale wa Bafana Bafana Vho-Quinton Fortune vho tsivhudza mugudisi Hugo Broos uri vha thogomele vhufhura, nga maanda nga murahu ha musi vho vha isa kha mitambo ya lifhasi.

Vho-Fortune, mutambi wa kale wa Manchester United na Atlético Madrid, vho dzumbululela vha Senate kha nyambedzano yo khetheaho ine mugudisi wa Bafana a fanela u i ṱhogomela.

Vho-Quinton Fortune vhari Hugo Broos u fanela u ḓilonda kha vhalanguli vhane vha vha nnḓa ha shango ngauri vha ḓo lingedza u mu linga nga tshelede uri a dzhenise vhatambi vhavho kha thimu yawe.

“Vhalanguli vha thimu dza nnḓa vha kha fulo ḽa u ṱanganyisa vhagudisi uri vha katele vhatambi vhavho kha thimu dza lushaka…

“Hezwi zwihuluhulu musi Tshiphuga tsha Ḽifhasi ngei USA tshi tshi khou sendela nga u ṱavhanya,” ho amba Fortune.

“Vha khou kunga nga tshelede nnzhi kha vhagudisi vha Afrika na Tshipembe u itela u maketa vhatambi vhavho vha World Cup.

“Vha ṱoḓa vhatambi vhavho vha tshi vha kha World Cup uri vha kone u vhonwa nga dzi club khulwane dza Europe.”

Quinton Fortune vhari vhufhura uhu ha u langa vhatambi ndi zwiito zwivhi zwine zwa khou thithisa nyaluwo ya bola ya milenzhe ya Afrika kha vhuimo ha dzitshaka.

“U ṱangana ha vhathu uhu nga vhalanguli vha vhatambi hu khou vhulaha mvelaphanḓa ya mashango a Afrika kha bola ya milenzhe ya ḽifhasi,” Fortune o engedza.

“Ni ḓo humbula uri Broos o thivhela vhalanguli vha vhatambi vha Bafana Bafana, ndi ngazwo thimu i tshi khou tshimbila zwavhuḓi.

“Vhagudisi vha kale vha Bafana Bafana vho vha vha tshi dzhielwa fhasi kanzhi kha mushumo wavho nga vhalanguli.”

Fortune o dzula Europe lwa tshifhinga tshilapfu nahone u pfesesa zwavhuḓi vhuaḓa ha vhalanguli kha bola ya milenzhe.

• VHALANI HEZWI: Vha Chiefs vho amba nga ha mafuvhalo a vhatambi vha ndeme

O fhedza tshifhinga tshilapfu e Europe sa mutambi nahone zwenezwino o vha e na Tigres UANL ngei Mexico he a vha e muthusi wa  mugudisi.