Ndi fulufhela uri McKenzie u pfesesa mikano – Motsepe
Muphuresidennde wa Caf Vho-Patrice Motsepe vhari vha na fulufhelo ḽa uri minisiṱa wa zwa mitambo Vho-Gayton McKenzie a vha nga ḓo pfuka mulayo wo khwaṱhaho wa Fifa malugana na u dzhenelela ha muvhuso.
Hezwi musi Gayton McKenzie vha tshi khou ṱuṱuwedza vhuḓifhinduleli u bva kha Safa malugana na u bviswa ha phoindi dza Bafana Bafana kha Tshiphuga tsha Ḽifhasi.
Afrika Tshipembe ḽo bviseliwa phoindi tharu nga murahu ha musi ḽo dzenisa Teboho Mokoena a songo teaho kha mutambo wa u ṱanganela kha Tshiphuga tsha Ḽifhasi tsha 2026 na Lesotho mathomoni a ṅwaha uno.
Minisiṱa Vho-Gayton McKenzie vho ṱoḓa phindulo kha Safa, vha ṋea dzangano maḓuvha a sumbe u ṋetshedza muvhigo wo fhelelaho wa uri Mokoena we a imiswa mushumoni o fhedza hani o tamba.
Musi vha tshi khou amba kha Sanef Gala Dinner ngei Houghton nga Ḽavhuṱanu vhusiku, Vho-Motsepe vho amba uri vha tenda uri Vho-McKenzie vha ḓo shumana na mafhungo aya nga vhuronwane nahone nga ngomu ha muhanga wa Fifa.
“Mashango oṱhe a pfesesa vhufarisani vhukati ha bola ya milenzhe na muvhuso, fhedzi hu na mikano i re khagala,” ho amba Vho Motsepe.
“Mivhuso a yo ngo fanela u dzhenelela.Ndi nga humbula uri zwine minisiṱa wa mitambo a khou davhidzana na Fifa zwi ḓo dzula zwi kha milayo yeneyo yo khwaṱhaho.
“Arali hu na mafhungo, ndi na fulufhelo ḽa uri a ḓo tandululwa nga nyambedzano dzo teaho.”
Vho-Gayton McKenzie vho no ṅwalela muphuresidennde wa Fifa Vho-Gianni Infantino, vha tshi khou humbela pfarelo kha vhukhakhi ha vhulanguli.
- VHALANI HAFHU : Khanyisa Mayo o amba nga vhukhakhi he a vhuita
Vho dovha vha mu fulufhedzisa uri zwiito zwawe a si u lingedza u dzhenelela kha vhuvhusi ha bola ya milenzhe.
