” vho nrumela maluvha a mutengo wa fhasi”-Parker
Bernard Parker o sasaladza Mamelodi Sundowns nge vha mu rumela ‘maluvha a mutengo wa fhasi’ nga murahu ha musi o huvhadzwa nga mutambi wavho wa tshenetsho tshifhinga Bongani Zungu.
Mutambi wa phanḓa o litshaho mushumo – ane zwino a vha tshipiḓa tsha vhagudisi vha TS Galaxy – o vunḓea mulenzhe nga murahu ha u raiwa luvhi nga Zungu kha mutambo wa Carling Knockout Cup miṅwahani i si gathi yo fhiraho.
U itela u mu humbela pfarelo na u sumbedza u ḓisola kha zwiito zwa mutambi wavho, Sundowns yo rumela maluvha kha Bernard Parker musi e vhuongeloni.
Fhedzi u humbela pfarelo a zwo ngo ṱanganedzwa zwavhuḓi nga ‘Die Hond’, sa vhunga Parker a tshi ḓivhea kha bola ya milenzhe yapo.
Musi a tshi khou amba na Smash Sports zwenezwino, Parker o vula nga ha uri Zungu o mu nyadza hani, nahone a dovha a sema Sundowns.
“Vhathu vhothe vho vha vha tshi nndalela vhuongeloni fhedzi ahuna muthu a bvaho Sundowns we a ḓa u mmbona vhuongeloni,” Parker o ralo.
- vhari wana kha facebook| facebook.com/profile.
Mugudisi wa Sundowns nga tshenetsho tshifhinga, Vho-Rulani Mokwena, vhari vho rumela Parker mulaedza wa u humbela pfarelo, khathihi na maluvha na tshokoleti.
Fhedzi Bernard Parker o landula hezwi zwoṱhe, a ri Mokwena o zwifha nga ha mulaedza sa izwi a songo vhuya a u wana.
“Ndo wana maluvha fhedzi o vha a sa bvi kha mugudisi Rulani Mokwena, ndi mulanguli wa thimu we a rumela maluvha.
“Ho vha hu a mutengo wa fhasi a R350… Vho vha vha si na maluvha a R500. Nahone ho vha hu si na chocolate.
“Rulani o zwifha kha tshitshavha a tshi ri o nthumela mulaedza – ha ngo vhuya a nthumela mulaedza. Ha ngo vhuya a nfounela,” Parker o engedza.
